O IES Muralla Romana de Lugo mostra ao alumnado as oportunidades do sector dixital

O IES Muralla Romana de Lugo acolle esta semana, os días 23 e 24, un encontro para tender pontes e vieiros entre a comunidade de estudantes, por unha banda, e o tecido produtivo tecnolóxico da nosa terra, pola outra. Estamos a falar do foro Perfís profesionais no sector das TIC, que, como o seu propio nome indica, diríxese a mostrar as posibilidades (amplas, variadas en proceso de proxección e crecemento) de saída laboral que ofrece á xuventude o mundo das novas tecnoloxías, amais das principais necesidades e demandas das empresas.
Na cita participarán un total de 10 firmas representativas do sector, expoñendo ao alumnado que se está a formar nestes ámbitos (nos ciclos formativos da familia profesional de informática e comunicacións) as necesidades formativas que demandan e os perfís profesionais máis axeitados para incorporarse a un mercado laboral “cun enorme dinamismo”, segundo apunta a organización destes encontros.
Na presentación das xornadas, o mércores 23 ás 10:00 h, participará Roberto Pérez Rodríguez, xerente do Clúster TIC Galicia, o xornalista Ernesto Sánchez Pombo e un representante da Consellería de Educación, Cultura e FP.
O programa de actividades, que se pode consultar na web do IES en formato PDF, inclúe presentacións e charlas dalgunhas das nosas firmas máis punteiras do ámbito dixital: Coremain, Raiola Networks, Bahía Software, Wide Partner, Lugonet, Gompute, Comunitea, Dinahosting, DML Web ou Everis. Asemade, haberá obradoiros sobre ERP ou desenvolvemento de software (Devops).
A cita co alumnado do IES Muralla Romana vén da man do Clúster TIC Galicia, o propio IES Muralla Romana e a Consellería de Educación.