O IET e AMTEGA lanzan unha ferramenta para calcularmos ata onde podemos chegar cos nosos percorridos na desescalada

O Goberno galego vén de activar unha ferramenta tecnolóxica que facilita os desprazamentos nestes intres de desescalada do Estado de Alarma pautada polo Goberno ao indicarnos onde está o límite do itinerario a percorrer. O sistema inclúe un visor do que podemos botar man a través da páxina web do Instituto de Estudos do Territorio (IET). A ferramenta, habilitada en colaboración coa Axencia para a Modernización Tecnolóxica de Galicia, ofrece aos cidadáns “a posibilidade de calcular con precisión o radio no que poden desprazarse e planificar así as súas saídas”.
A Consellería de Medio Ambiente, Territorio e Vivenda, da que depende o IET, salienta que esta ferramenta online é de utilidade xa que existe certa complexidade á hora de saber, sen axuda das tecnoloxías, canto se poden afastar os nenos dos seus fogares e até onde está permitido que cheguen os deportistas e os paseos en familia.
Segundo informan o IET e AMTEGA, os usuarios interesados en utilizar esta ferramenta teñen dúas formas de calcular as distancias. A primeira consiste en fixar directamente sobre o mapa cun punteiro a localización do lugar de residencia e establecer a partir de aí o radio máximo de desprazamento. A outra opción é calcular directamente a través da pestana Medidas un percorrido concreto seguindo os propios viarios.