O IGAPE, a EOI e a Tecnópole dan o pulo definitivo ao seu centro de coworking

luns, 10 de xaneiro do 2022 S. P.

A Tecnópole de Ourense (Parque Tecnolóxico de Galicia) compartiu detalles do espazo de traballo innovador e colaborativo que vén de impulsar xunto co IGAPE e a Escola de Organización Industrial (EOI), un centro de coworking que “nace como un novo espazo para a actividade económica e profesional, destinado a impulsar ideas de negocio viábeis”. Segundo fixo saber a Tecnópole, a convocatoria está aberta a emprendedores cun proxecto empresarial en fase temperá de desenvolvemento ou cunha empresa creada recentemente (non máis de seis meses antes da súa incorporación ao espazo de coworking).
O centro IGAPE-EOI-Tecnópole abéirase ao programa Espacio Coworking a escala nacional da Esola de Organización Industrial e está co-financiado polo Fondo Social Europeo.
A Tecnópole engade que en Galicia son 11 os espazos que integran este programa, tres deles en Ourense: O Carballiño, A Rúa e o de Tecnópole.
No transcurso do programa desenvolveranse unha serie de actividades, como por exemplo obradoiros (nos que axudar a emprendedores a validar o modelo de negocio con metodoloxías áxiles, así como a desenvolver as habilidades imprescindíbeis para polo en marcha) ou sesións de asesoramento (mentoring) por parte de expertos (centradas en acompañar aos emprendedores desde o deseño de modelo de negocio á posta en marcha e optimización do proxecto, dando resposta ás necesidades que xurdan no camiño). Amais, haberá xornadas de formación grupal nas que traballar materias específicas para o impulso e despegue o dos proxectos do espazo coworking.
Como peche da edición celebrarase un Demo Day, durante o cal presentaranse os proxectos participantes, a súa evolución e as posibilidades de colaboración cos mesmos.
A matrícula neste programa, que se desenvolverá entre os meses de febreiro a xuño deste ano, é gratuíta. Pódese solicitar praza na web da EOI.

PUBLICIDADE