O ITG permitirá aforrar ata 200 euros de luz aos veciños de Xermade

O centro tecnolóxico ITG (Instituto Tecnolóxico de Galicia) está a desenvolver e testar solucións tecnolóxicas para deslocalizar a produción de enerxía e reducir o impacto ambiental e o importe da factura da luz, como parte do seu traballo en CEL Rural. O seguinte paso desta iniciativa, que conta coa participación da Federación Galega de Municipios e Provincias (FEGAMP), entre outros socios españois e portugueses, é a selección dun novo municipio en Galicia para desenvolver unha Comunidade Enerxética Local (CEL), que permitirá aos veciños xestionar e compartir recursos enerxéticos.
A creación deste piloto nunha contorna rural chega tras o éxito no concello lucense de Xermade que, mediante á posta en marcha dunha CEL rural co asesoramento de ITG a principios deste ano, conseguiu un aforro na factura enerxética de 200€ anuais. Así, actualmente está aberta unha nova convocatoria para que a FEGAMP leve a cabo a selección dun novo municipio que se beneficie deste modelo de xestión de enerxía. Desta forma, desde ITG búscase levar a transición enerxética ao rural a través de solucións tecnolóxicas de enerxía intelixente.
A Comunidade Enerxética Local de Xermade púxose en marcha en xaneiro de 2025, permitindo os seus veciños ser donos da súa propia enerxía. A través de formación e a tecnoloxía desenvolvida por ITG, os 45 habitantes do municipio lucense adheridos a este piloto poden xestionar a enerxía que producen, almacenándoa ou decidindo como e cando investila, o que, segundo confirmou o ITG, “vailles permitir aforrar 200€ ao ano na factura enerxética durante os próximos 25 anos”.
A plataforma tecnolóxica desenvolvida por ITG para a CEL de Xermade fomenta o uso de enerxías renovables, a redución das emisións de CO2 e a adopción dun modelo enerxético máis descentralizado e sostible.
Os municipios interesados en postularse para o proxecto teñen ata o venres 4 de abril para presentar a súa candidatura; tras esta primeira fase decidirase que municipios acceden á fase final de entrevistas. O concello seleccionado ao final do proceso contará cunha comunidade enerxética despregada no marco desta iniciativa, que será xestionada con tecnoloxía desenvolvida por ITG. Leste piloto unirase ao catro xa existentes en Xermade (Lugo), Fontiveros (Ávila), Culatra (Algarve) e Vilaverde (Braga), estas dúas últimas en Portugal.