O ITMATI presentou os seus avances en sistemas smart para emerxencias, enerxía e vehículos eléctricos
luns, 15 de maio do 2017
O
Instituto
Tecnolóxico de Matemática Industrial (ITMATI) presentou o pasado 12
de maio a súa memoria anual e os seus casos recentes
de éxito.
E fíxoo nunha xornada de portas abertas que conseguiu convocar un
nutrido grupo de representantes de institucións públicas e de
centros tecnolóxicos, investigadoras/es do ámbito público e
privado e profesionais das nosas empresas máis innovadoras. A
xuntanza
Coñece o ITMATI celebrouse
na
Facultade de Matemáticas da
USC
e nas instalacións do propio centro. O encontro serviu tamén
para estreitar ligazóns de colaboración con empresas e
administracións públicas. O
presidente do ITMATI, Salvador Naya Fernández, vicerreitor de
Política Científica, Investigación e Transferencia da UDC,
presidiu o acto. Entre
os casos de éxito mostrados achábase un software avanzado para a
xestión do transporte de gas ou, tamén, o desenvolvemento de
sistemas intelixentes para voos cooperativos de emerxencia.
A
directora do Instituto Tecnolóxico de Matemática Industrial
(ITMATI) e catedrática de Matemática Aplicada, Peregrina Quintela
Estévez, foi a encargada de presentar a memoria de
2016. Quintela salientou que
“o ITMATI é
xa un centro maduro
e, a medio prazo, consolidará o seu orzamento
co financiamento privado, captado a través de contratos de
transferencia con empresas e institucións, e de proxectos
competitivos”.
En
relación aos ingresos do
ITMATI,
fíxose
saber na xornada que
aumentaron un 2,75 por cento: pasaron de 1.087.372,89€ en 2015 a
1.117.288,40€ o ano pasado. Tamén
se explicou que desta
cifra, o 89,55% foi captada a través de contratos ou proxectos
competitivos de I+D de transferencia, levados a cabo con empresas,
centros tecnolóxicos e institucións; procedendo
os ingresos
restantes proceden das tres universidades galegas (0,72% do total) e
dun convenio de colaboración co Ministerio de Defensa e outro coa
Consellería de Cultura, Educación e Ordenación Universitaria (a
suma de ambos representan o 9,73% dos ingresos totais).
Entre
as cifras analizadas, destaca o montante dos contratos de I+D
directos con empresas ou no marco de convocatorias públicas, que
pasou de 9.000 euros ao comezo do trienio (2013/2016) aos 791.764,38€
euros en 2016, cunha captación adicional de proxectos de I+D
competitivos de 208.479,59€.
Na
memoria tamén se fai saber que o
persoal do ITMATI “foi quen de captar cinco novas empresas como
clientes o ano pasado, que sumadas ás que xa tiña en carteira o
centro, fan un total de 20 as organizacións empresariais que
confiaron no centro en 2016”.
A
maiores, o
número de contratos desde que o centro se puxo en marcha elévase a
45, dato que tamén apunta á consolidación do instituto.
No
reconto de cifras e froitos acadados ao longo do a no pasado tamén
se recorda a posta en marcha da Unidade
de xestión de Transferencia (UxT), ao abeiro dun convenio asinado
coa Secretaría Xeral de Universidades. Esta
unidade, explícase no informe, incorporou
dous xestores de transferencia de tecnoloxía e innovación e dous
xestores de transferencia e tradutores de tecnoloxía nos eidos de
simulación
e Big Data (análise
da información masiva).
O obxectivo final da unidade é “que o ITMATI consolide finalmente
a súa actividade de transferencia da ciencia e da tecnoloxía
matemática á industria, cunha estrutura adaptada ás necesidades do
tecido industrial, para incrementar así o número de colaboracións
e proxectos a desenvolver, e poñer en valor o coñecemento
científico no eido
da matemática industrial existente nas tres universidades galegas”.
Polo
que respecta á internacionalización, o ITMATI afianzouse no
panorama europeo participando en
tres iniciativas propostas por EU-MATHS-IN e
fortaleceu o seu traballo con grupos de investigación estranxeiros,
como por exemplo no
traballo Electrical
conditions and their processs interactions in high temperature
metallurgical reactors (ElMet),
co instituto de investigación industrial noruegués
Teknova. Ademais, concorreu
de xeito proactivo
en 18 encontros tecnolóxicos de carácter internacional; de feito,
presentáronse cinco propostas europeas.
Polo
que respecta aos casos de éxito, na xornada de portas abertas
destacáronse exemplos de transferencia e cooperación como a Unidade
Mixa de Investigación REPSOL-ITMATI (a través da que a firma
enerxética busca
incrementar a vida útil das baterías que usan os vehículos
eléctricos e mellorar o proceso de recarga rápida, así como
optimizar os procesos de toma de decisións,
incorporando a incerteza que existe nos prezos, demandas e calidade
de materias primas e produtos, entre outros aspectos)
ou o proxecto ENJAMBRE (iniciativa
para misións
críticas de emerxencias con medios aéreos tripulados e non
tripulados en voo cooperativo, sendo o seu obxectivo principal
desenvolver
sistemas intelixentes para o control avanzado de traxectorias que
permita a operación cooperativa entre aeronaves tripuladas e non
tripuladas RPAS, axudando á caracterización do territorio e á
eficiencia das operacións de descarga na loita contra incendios
forestais).
Tamén
se fixo fincapé na importancia que cobraron en 2016 os proxectos
GANESO (simulación
e optimización de redes de gas, sendo
o seu obxectivo
principal a xestión integral e óptima de infraestruturas de
transporte de gas natural, froito
do cal xurdiu o software
GANESO)
e un proxecto coa empresa Silicio Ferrosolar que se dirixe a dar
forma a un forno industrial que purifique o
silicio solar por evaporación en baleiro de impurezas (o
obxectivo é mellorar a eficiencia e a produtividade deste tipo de
fornos).
Postos
de traballo tecnolóxico e
importante presenza de mulleres
O
número de empregos tecnolóxicos creados nestes 3 anos de vida do
ITMATI
é un aspecto a ter moi en conta, en opinión dos responsábeis
do Instituto, que
sinalan que
“é importante consolidar postos de traballo tecnolóxicos de
primeiro nivel que axuden a completar a formación investigadora no
eido da transferencia dos mozos e mozas recentemente titulados, e
crear así unha rede de persoal altamente cualificado en matemática
industrial que poida incorporarse posteriormente aos departamentos de
I+D de empresas, centros tecnolóxicos e institucións”, informou
Peregrina
Quintela na presentación
da memoria, na que tamén fixo fincapé na importante presenza de
mulleres no instituto, cuxa porcentaxe é do 33%.