O Ministerio de Industria leva á Coruña unhas xornadas de promoción do software legal

Salvador Soriano promocionando na Coruña as vantaxes do software legal

O subdirector xeral da Sociedade da Información do Ministerio de Industria, Turismo e Comercio, Salvador Soriano, presidiu hoxe a IV Xornada da Campaña Software 100 por 100 legal na Cámara de Comercio de A Coruña que se dirixe á canle de distribución de aplicacións informáticas para promover un cambio de tendencia en España, onde o uso de software pirata é moi elevado cun 46% de media (que nos fogares chega incluso ó 90%).
Soriano quere promover así a figura do software legal, pois afirma que a “piratería non é rendible para ninguén” (pois prexudica a fabricantes, distribuidores e usuarios) e supón un importante freo para a incorporación á Sociedade da Información así como é un importante atranco para a innovación.

O Ministerio de Industria incorpora esta campaña no Plan Avanza, e diríxese á canle de distribución de software porque é o que consideran que pode dar uns resultados máis inmediatos e efectivos, aínda que no futuro incrementarán as súas actividades nesta dirección, posto que a campaña Software 100 por 100 legal se espallará no tempo.
A campaña xa ten unha páxina web, e dende o Ministerio de Industria tamén emprenderán outras vías de concienciación sobre a problemática da piratería de software, como a edición de boletíns, accións de marketing, encontros con profesionais e mesmo a creación dun selo de calidade que dea seguridade ós consumidores informando dos distribuidores e empresas que garanten o uso de software legal.
Precisamente a seguridade foi un dos elementos que destacou Salvador Soriano en A Coruña, incidindo no feito de que o software descargado a través de redes P2P inclúe no 68% dos casos algún efecto non desexado (spyware ou malware) polo que recomendou o uso de software legal xa que así non se pon en risco a información almacenada nos nosos equipos informáticos ante virus ou troianos, ou calquera outro efecto imprevisto do uso de aplicacións informáticas de procedencia pouco fiable.