O Parlamento Europeo, a prol da accesibilidade web na súa nova proposta na Rede

Este xoves 12 de abril a Oficina do Parlamento Europeo en España, en colaboración coa ONCE, presentará a súa páxina web española accesible a tódalas persoas con discapacidade (www.europarl.es). O obxectivo desta iniciativa é achegar as actividades da Eurocámara ó meirande número de cidadáns e facilitarlle o acceso á información europea a todos aqueles que sofren algunha discapacidade. O sitio virtual da Oficina do PE en España, logo dun ano de traballo, vai encamiñado así a cumprir a directiva europea que obriga a tódalas institucións públicas a garantir a accesibilidade das súas páxinas en Internet ás persoas con discapacidade.
Estas persoas, mediante unha axuda técnica específica (dependendo do seu tipo de discapacidade), poderán acceder virtualmente ás últimas novas relacionadas coa devandita institución, á actualidade parlamentaria europea e á información sobre os eurodeputados e sobre os políticos europeos (entre outros contidos). Asemade, tamén poderán achegarse a outros espazos como o correo do cidadán, o dereito de petición, o espazo do Defensor do Pobo Europeo ou as publicacións que se editan no PE.