O SERGAS organiza un foro virtual con motivo do Día Mundial da Saúde Mental

No marco do Día Mundial da Saúde Mental, que por certo se celebra hoxe mesmo, a Dirección de Asistencia Sanitaria do Servizo Galego de Saúde e a Escola Galega para Cidadáns van organizar, a través de Internet, un foro virtual no que as persoas interesadas poderán obter información puntual e detallada sobre as cuestións que os inqueden en relación ás enfermedades mentais.
Esta actividade, que forma parte do Proxecto Nise contra o estigma na enfermidade mental, desenvolverase a partir das 17 horas, e nela poderán participar todas aquelas persoas que o desexen, accedendo á web da Escola Galega de Cidadáns.
Unha vez dentro da web, os usuarios deberán premer no apartado O experto responde onde figurará un acceso aberto para enviar cadansúas preguntas ou cuestións en relación ás enfermedades mentais, que serán respostadas polos profesionais en tempo real.
Os tres especialistas convidados polo departamento que dirixe Pilar Farjas Abadía e aos que a cidadanía poderá plantexar todas as preguntas que considere relevantes son: Mario Páramo, psiquiatra e presidente da Asociación Galega de Psiquiatría; Gonzalo Martínez, psicólogo clínico e presidente da Asociación Galega de Saúde Mental; e José Ramón Girón, médico de familia e presidente de FEAFES Galicia.
Segundo informan dende o SERGAS, con este foro de expertos inaugúrase o Proxecto Nise contra o estigma na enfermidade mental, que se levará a cabo en Galicia ata o ano 2014, e que “será unha das liñas estratéxicas prioritarias en saúde mental do Servizo Galego de Saúde”.