O Seminario Muller e Universidade quere tirar proveito da Rede para traballar pola igualdade

A Rede como factor de unión. Este, lonxe de aspectos máis estritamente técnicos, é a metade do código sobre o que se asenta a nova páxina web do Seminario Muller e Universidade da USC, que foi presentada este martes no Colexio de Fonseca, nun acto no que participaron a vicerreitora de Calidade, Dolores Álvarez, e a coordinadora do Seminario, Monserrat Nogueira. A iniciativa, que asenta a súa outra metade sobre a idea de Internet como instrumento de igualdade, bebe directamente das fontes da Web 2.0, a participativa, constituíndo un espazo para o intercambio de coñecemento e, tamén, para a acción, “aumentando a capacidade de mobilización do Seminario”.
Centrándonos máis nos aspectos concretos da web, cómpre subliñar que amais de ser un foco de información sobre igualdade de oportunidades e acceso ó coñecemento, o site achega todo tipo de datos sobre as actividades do Seminario, recursos acerca do labor de científicas e investigadoras, un boletín actualizado de novas e un foro sobre o papel das mulleres galegas na totalidade de sectores económicos e sociais, “alén da ciencia e da tecnoloxía”, segundo sinalan as súas responsables.
Subliñar que o Seminario Mulleres e Universidade comezou a súa andaina hai xa cinco anos, co obxectivo concreto de loitar contra as diferenzas entre homes e mulleres en todos os eidos do sistema universitario da nosa terra.