O Software multi-formato de Flumotion gaña o Óscar do Streaming deste ano

O Software de Streaming de Flumotion, que na actualidade lle ofrece servizo a grupos de medios como Antena 3, COPE e RTVE, vén de facerse co Oscar do Streaming deste ano, na categoría de Best Streaming Innovation, ao acadar unha ampla maioría de votos.
Este galardón, que premia 24 meses de esforzos no desenvolvemento dunha tecnoloxía que simplifica o acceso ao mundo do streaming, é un evento de referencia nesta industria e destaca os produtos e servizos emerxentes máis revolucionarios do sector.
O conxunto de prestacións de streaming que ofrece esta compañía é único en todo o mundo e mostra como a innovadora tecnoloxía de Flumotion “está a cambiar a industria”.
Segundo os expertos, “cada usuario pasa unha media de 3 horas ao mes mirando vídeos en Internet”, esta plataforma, que ofrece unha selección moi ampla de contidos multimedia, permite vivir unha experiencia personalizada e interactiva.
Asemade, para as compañías, o vídeo en liña en streaming estase a converter en algo imprescindible, como o era ter unha páxina web a finais dos 90, e na actualidade, as empresas están a ver como o vídeo en streaming é “o novo motor da comunicación”.
Para facer do streaming unha tecnoloxía de uso común, é esencial, segundo afirman, “ofrecer solucións end-to-end (de inicio a fin), que permitan aos clientes cubrir o proceso de streaming enteiro, dende a codificación do vídeo ou audio ata a súa retransmisión en liña, incluíndo ademais as licenzas dos códecs de terceiros”.
O Software de Streaming de Flumotion, gañador do galardón deste ano, é o único produto en todo o mundo que ofrece esta combinación única de prestacións e licenzas, e que conta cunha e-shop, unha aplicación que lle permite aos clientes adaptar o software de streaming ás súas necesidades técnicas e financieiras.
A tecnoloxía de Flumotion permite, asemade, que as distintas TV, emisoras de radio e portais de vídeos en liña, poidan retransmitir contidos dende os seus propios equipos.
En tan só un día, o usuario pode configurar o sinal e facelo chegar a 1.000 usuarios simultáneos, visualizando vídeo a 500 Kbps; ou a 7.600 usuarios á vez se escoitan audio a 64 Kbps.