O VLC xerará subtítulos automáticos mediante IA

Aínda que non teñan un interese comercial, os responsables do reprodutor multimedia VLC estiveron presentes no CES de Las Vegas, onde anunciaron que a súa aplicación estaba a superar os 6.000 millóns de descargas a nivel mundial e presentaron unha novidade moi interesante: o VLC contará cun sistema de xeración automática de subtítulos (con función de tradución) baseado en modelos de IA capaces de correr en local.
Estamos ante unha interesante función que tamén están a incorporar televisores e sistemas operativos, pero que coa súa integración no VLC podería universalizarse na reprodución multimedia. Esta prestación resulta de grande utilidade para rachar barreiras lingüísticas, sendo tamén unha ferramenta moi valiosa para mellorar a accesibilidade do vídeo, de xeito que o pon ao alcance para persoas con problemas de audición, ou para calquera que queira ver un contido nun momento no que non pode escoitalo axeitadamente.
A xente de VideoLAN tamén aproveitou para dar conta da tecnoloxía de son inmersivo Eclipsa Audio, promovida por Google e Samsung, que grazas á implementación de código aberto de IAMF estará dispoñible na aplicación de VLC para ordenadores, móbiles e televisores.