O coworking de Barro alentou a creación de máis de medio cento de empresas

mércores, 26 de xuño do 2019 Redacción

O coworking de Barro vén de clausurar a súa terceira edición ratificando a súa aposta integral polo talento da provincia de Pontevedra. No acto, este martes 25, participaron o deputado Carlos López Font, o alcalde de Barro, Xosé Manuel Fernández Abraldes, e o director de aceleración empresarial da Escola de Organización Industrial (EOI), Javier Benito, quen confirmou que a raíz destas tres edicións de traballo innovador e colaborativo creáronse na provincia máis de 50 empresas.
Na xornada DemoDay os 20 proxectos emprendedores que participaron expuxeron ante o público as súas ideas de negocio, nun acto conducido por María Cheda, xornalista de Antena 3 Galicia.
Font asegurou que “este punto final é unha inmensa satisfacción xa que ter chegado a unha terceira edición significa que o coworking de Barro está consolidado” e porque “é un sinónimo de apoio ao emprendemento, á xeración de emprego e ás futuras pequenas e medianas empresas”.
A xornada DemoDay. Emprendendo cara ao Futuro tivo como obxectivo principal dar a coñecer os proxectos participantes na terceira edición do coworking de Barro, froito da colaboración entre a Deputación de Pontevedra e a EOI. Segundo se fixo saber, dende febreiro e até hoxe un grupo de 22 emprendedoras e emprendedores (14 mulleres e 8 homes) ocuparon un espazo gratuíto no viveiro local, onde recibiron acompañamento individualizado e 100 horas de accións formativas específicas para garantir o éxito dos seus proxectos.
Durante a xornada, celebrouse unha conferencia a cargo de Sandra Villar, fundadora da empresa Boina galega, que recibiu o ano pasado o premio Emprende Gaiás Sixto-Seco e participou nun coworking tamén impulsado pola EOI en Santiago de Compostela.
Na terceira edición do coworking de Barro impulsáronse sobre todo proxectos relacionados co turismo. Ademais, houbo iniciativas vencelladas á moda, a gastronomía, a fotografía, a comunicación, a psicoloxía ou á actividade física. Presentáronse en dous bloques: Turismo e sustentabilidade e Servizos a PEME e cultura. Os 20 proxectos son: AT Gestión, de Adriana Rodríguez, Rooteiro, de Andrés Rodiño, A Casa da Carballeira, de Beatriz Bergueiro, Pasaporte Rural, de Betty das Neves Gil, Culebra Studio, de Cecilia Paredes, Dedicate Home, de Cristina Iriso, Mundo Escénico, de Daniel Amós, Tribuaventuras, de Diana Nogueira e Eva García, Prixma, de Fernando López, Herbas do Crego, de Fernando Romariz, José Gadea Fotografía, de José Gadea, Márketing con Iris, de Laura Guillén, Habla y Convence, de Lucero Dámaso, A batea do mercado, de María Casas, Xouxere, de María Rodríguez, Lía B, de Olalla Borrego, Materialdefisioterapiaonline, de Pedro Cubela, Xacobleas, de Pilar Alonso, IDIGAL, Santiago Iribarren e, por último, Huella Menguante, de Sonia Magariños.
Esta foi a terceira das catro edicións coas que conta o proxecto, que botou a andar no mes de novembro de 2017.

PUBLICIDADE