O emprego da Rede nos maiores de 65 é practicamente nulo, segundo un estudo

Segundo datos do Instituto Nacional de Estatística (INE), o número de internautas en España ascende a día de hoxe a vinte millóns, e, asemade, a cantidade de conexións de banda ampla multiplicouse por catro nos últimos catro anos. Porén, malia estas cifras que poderíamos cualificar de esperanzadoras, aínda queda un corenta por cento da poboación que non empregou nunca Internet, un dato que mostra moi ben a situación de ralentización que está a sufrir o espallamento das TIC en España.
Un estudo levado a cabo por Enter, co patrocinio de Telefónica e Red.es en colaboración con Metroscopia denominado Inhibidores do emprego das TIC na Sociedade Española, atribúelle este atranco a varios factores, entre os que destaca a idade. Segundo o devandito estudo, “a idade é o principal freo para o uso da Rede na sociedade española” xa que, a partires dos 45 anos, e a medida que se incrementa a idade, vai descendendo o número de usuarios de Internet, ata chegarmos ós 65 anos, idade a partir da cal, a cifra de usuarios das novas tecnoloxías da comunicación e a información é practicamente nula.
Polo contrario, a predisposición máis favorable ó emprego das TIC concéntrase nos grupos de poboación de menos de 45 anos, e moi especialmente por debaixo dos 25, así como naquela poboación que cursou estudos secundarios completos ou superiores.
Ademais da idade ou do nivel académico, outro factor condicionante son os ingresos familiares; non así outros aspectos como o prezo dos servizos, o sexo ou a situación xeográfica que, en contra do que poderíamos pensar nun primeiro intre, non aparecen como inhibidores neste estudo ou fano de xeito irrelevante.
A adaptación das TIC vese moi favorecida sempre pola actitude protecnolóxica ou positiva ós cambios e o informe apunta a un escenario máis “tecnolóxico” para o vindeiro 2030, cunha gran maioría da poboación activa.