O investigador do CiTIUS Alejandro Ramos é recoñecido polo seu traballo en sistemas intelixentes
venres, 2 de xuño do 2017
O investigador
posdoutoral Alejandro Ramos vén de acadar un importante
recoñecemento estatal ao seu labor en materia TIC e, máis polo
miúdo, polos seus esforzos na busca de recursos tecnolóxicos que
sexan quen de permitirnos entender da maneira máis doada posíbel os
datos inxentes xerados e tratados polos grandes sistemas de xestión
e cálculo. Alejandro Ramos é investigador do CiTIUS (Universidade
de Santiago). Segundo nos conta a USC, foi un seis doutores
distinguidos na I
Edición dos Premios de Investigación Sociedade Científica
Informática de España-Fundación BBVA (SCIE-Fundación
BBVA).
Estes galardóns están dirixidos a doutores
menores de 30 anos que desenvolveran a súa tese nunha universidade
ou centro científico do ámbito estatal. Amais, pretenden servir de
estímulo á creatividade, a orixinalidade e a excelencia. Para máis
información sobre o traballo de Ramos podemos
visualizar un vídeo específico no YouTube acerca das
contribucións do investigador ao proxecto GALiWeather.
Segundo nos contan dende a Universidade o
investigador distinguido pola Fundación BBVA doutorouse
en Tecnoloxías da Información o pasado mes de decembro, logo de
defender con éxito a súa tese desenvolvida ao longo dos últimos
anos no Grupo de Sistemas Intelixentes da USC. A principal
contribución do traballo é que, por primeira vez, aplicáronse
teorías de conxuntos borrosos ao ámbito das tecnoloxías de
tradución automática de datos a texto (Data-To-Text technologies - D2T); un novo paradigma que ofreceu como resultado un sistema capaz
de converter automaticamente a linguaxe natural os datos de carácter
numérico-simbólico empregados por MeteoGalicia. De aí xurdiu,
precisamente, a ferramenta GALiWeather,
unha aplicación que xa foi obxecto de máis de 13 millóns de
visitas e que é quen de traducir a diario a previsión meteorolóxica
para os 314 municipios da comunidade “dunha maneira flexíbel e
precisa”, explica a USC, engadindo que a aplicación ten a
facultade de atinxir detalles de maneira moi semellante a nós, os
humanos.
A Universidade tamén salienta outro dos grandes
achados da tese do investigador: que por primeira vez propón a
colaboración de dúas disciplinas que non traballaran aínda de
maneira conxunta: a intelixencia computacional (máis polo miúdo, a
lóxica borrosa) e a xeración de linguaxe natural (Natural
Language Generation - NLG). O traballo abriu unha liña de
colaboración internacional coa Universidade de Aberdeen (Escocia), á
que se incorporará proximamente o Instituto de Lingüística da
Universidade de Malta.
Vídeo que dá conta de GALiWeather