O proxecto de escolas rurais 2.0 do CESGA, semifinalista nos premios Educared

O proxecto galego Escolas rurais virtuais para a computación na nube, implantando recentemente no Colexio Rural Agrupado de Boqueixón-Vedra, vén de superar a primeira fase dun dos certames de innovación tecnolóxica aplicada á ensinanza de meirande prestixio estatal, europeo e mundial. Falamos da nova edición dos Premios Internacionais Educared, un concurso dirixido a recoñecer o máis salientable da formación 2.0 no eido iberoamericano e que arestora atópase preto de afrontar un dos seus intres máis decisivos: a elección dos finalistas dos galardóns entre a listaxe dos 400 proxectos que superaron a primeira fase, a dedicada á avaliación. Entre estes 400 semifinalistas que soben ao segundo chanzo da convocatoria atópase o proxecto galego.
Por certo que este ano presentáronse aos premios preto de 4.000 traballos de 29 países, entre os que se contan Arxentina, Brasil, Bolivia, Colombia, Cuba, España ou Portugal. A primeira fase do certame consistiu na revisión pormenorizada de tódolos traballos por parte da Comisión Técnica do Xurado, un equipo constituído por 80 profesionais dos mundos educativo e profesional (docentes, profesores universitarios, xornalistas, especialistas en aprendizaxe en liña e máis en redes sociais) e que seleccionou para a segunda fase da convocatoria aqueles proxectos de meirande calidade e potencial.
Por certo que ao longo deste mes de agosto xa poderemos saber se o proxecto galego acada un posto entre os finalistas.
Dicir que a iniciativa de Escolas rurais virtuais vén da man do Centro de Supercomputación de Galicia, o CESGA, que afrontou este traballo cun obxectivo claro de loitar contra a fenda dixital que afecta a unha boa parte dos nosos ámbitos xeográficos non urbanos, e facelo dende a base mesma da ensinanza, amosando entre a comunidade educativa o amplo potencial das redes 2.0 para o desenvolvemento en tódalas súas facetas. A iniciativa, que é moi probable que se integre no Proxecto Abalar da Xunta, está a funcionar nas 7 escolas que compoñen o CRA Boqueixón Vedra e, tal e como fixemos saber dende esta web con motivo da presentación do proxecto, xunto coa Universidade de Idaho e unha universidade de Taiwan, conforman os 3 únicos centros do mundo que foron financiados por Hewlett Packard, HP, para desenvolver os seus proxectos piloto neste eido.
Grazas á tecnoloxía de computación na nube os profesores e alumnos das 7 escolas de educación primaria e infantil que compoñen o CRA galego, poden comunicarse entre si, traballar e facer actividades escolares de forma conxunta sen ter que desprazarse, a través da Rede. Para iso contan coa tecnoloxía cloud, en nube, que permite acceder a unha serie de servizos informáticos e responder ás necesidades do usuario de forma flexible e personalizada, a través de internet e sen necesidade da axuda de expertos informáticos.
Cunha solución de software libre e código aberto os usuarios traballan nunha plataforma sinxela que é axeitada tanto para o profesorado como para os estudantes e as súas familias, grazas á que non é necesario contar cos recursos e programas instalados en cada ordenador, senón que se pode contar cos materiais didácticos e recursos de aula nun espazo común, dispoñible dende calquera ordenador ou incluso móbil, conectado a Internet, para todos os membros da comunidade educativa.
Deste xeito ademais redúcense ao mínimo as dificultades técnicas, limítanse os custos de licencias de software, e créase unha contorna de traballo virtual a través dunha única aplicación lixeira, estruturada en varios niveis de acceso, segundo o perfil do usuario final.