O sector téxtil galego poderá coñecer esta semana diferentes solucións para ampliar mercados e competitividade

O Centro Demostrador TIC organiza esta semana, o xoves 15, unha xeira divulgativo-formativa sobre Solucións tecnolóxicas para a modernización da Industria Téxtil, que servirá para amosarlle ao noso tecido produtivo o que pode facer a nosa tecnoloxía innovadora a prol da súa mellora competitiva, de promoción, de busca de novos mercados e de xestión. A xornada, que se desenvolve en horario de 10:00h a 13:45h, fará un percorrido por distintas solucións TIC e por tódalas funcionalidades que ofrecen os nosos produtos: actualización do negocio, mellora do posicionamento en buscadores e índices, apertura a novos mercados, etc.
Entre as devanditas solucións inclúese, segundo informa o Centro Demostrador, “un sistema para o control do proceso de trazabilidade e outros procesos da cadea de valor, unha aplicación de intelixencia de negocio que axude aos directivos na toma de decisións estratéxicas para a súa empresa ou unha solución de xestión empresarial e planificación de recursos”.
O evento divulgativo-demostrativo diríxese sobre todo aos profesionais e/ou directivos das empresas galegas do sector téxtil. A asistencia é de balde, condicionada ao aforo do local, previa inscrición en liña a través do portal web do Centro Demostrador TIC.
Centro Demostrador TIC
O CDTIC, promovido pola Secretaría Xeral de Modernización, ten como obxectivo facilitar ás empresas do sector tecnolóxico os medios para acercar a súa oferta de produtos ás empresas doutros sectores produtivos. O Centro constitúe un punto de encontro entre a oferta TIC e a demanda tecnolóxica do tecido empresarial galego.