O servizo Yahoo! Mail ofrecerá capacidade ilimitada de almacenamento para os seus usuarios

Malia que ata o de agora o servizo de correo electrónico de Yahoo! vén liderando o sector deste tipo de servizo en liña con 250 millóns de usuarios, o espazo que propoñía estaba limitado a tan so 1 XB, unha oferta moi inferior ós 2,6 XB ofrecidos por Gmail de Google ou os 2XB que ofrece agora tamén Hotmail, os dous competidores máis directos da compañía norteamericana. Conclusión: estes estábanlle a roubar algúns dos mellores anacos do pastel.
Porén, a partires do vindeiro mes de maio, o sistema de correo Yahoo! Mail converterase nun espazo de almacenamento ilimitado e de balde para os seus usuarios debido a que o forte incremento do intercambio de fotos, vídeos e outras mensaxes multimedia entre os internautas, así o esixía.
Esta nova estratexia de Yahoo! é un paso lóxico (e moi agardado polos internautas) derivado do descenso do custo por unidade de almacenamento, e é que xa ía sendo hora, posto que o correo web semellaba non seguir o paso doutros dispositivos na carreira por amorear cada vez máis centos de XB, como os computadores ou simplemente os reprodutores multimedia (sen ir máis lonxe, o iPod de Apple, que, nunha das súas versións, pode chegar a almacenar ata 80 XB!)