O sistema CRM100 soluciona a práctica totalidade das chamadas perdidas nos centros de saúde
venres, 18 de febreiro do 2022
O xerente
do SERGAS, José Flores, visitou este 17 de febreiro de 2022, o
Centro de Saúde de Parda, en Pontevedra. Nel está instalada a
plataforma CRM100, un sistema de xestión da relación co paciente.
Trátase dunha solución innovadora que a Consellería de Sanidade
puxo en marcha dende comezos do ano pasado en 40 centros de toda
Galicia, sendo o obxectivo, despregrar esta plataforma tecnolóxica a
toda Galicia ao longo deste 2022.
Segundo indicou o xerente do SERGAS, esta ferramenta incorpora un
servizo de atención telefónica personalizada que “permite
resolver o 100% das chamadas perdidas nun mesmo día e cun tempo
máximo de resposta de dúas horas”. No centro de saúde de Parda,
dende que se instalou o sistema o pasado 10 de novembro de 2021,
recibiu un total de 8.301 chamadas (117 chamadas ao día), das cales
o 99% foron resoltas nun só día.
Peza clave na xestión da pandemia
José Flores tamén indicou que esta ferramenta permita xestionar,
mellorar e avaliar a interacción entre a cidadanía e o persoal
sanitario; optimizar a monitoraxe dos pacientes con COVID-19 e dos
seus contactos estreitos; completar citacións de procesos masivos de
vacinación; ou darse de alta na plataforma É-Saúde.
Reforzo da atención primaria
Por outra banda, aproveitou para destacar que baixo o abeiro do Plan
galego de atención primaria 2019-2021, produciuse un reforzo de
persoal sanitario, de renovación de mobiliario e de dotación de
novos equipos electromédicos. Xustamente, para o centro de saúde de
Parda incorporáronse: tres novos elecrocadriógrafos, tres novos
holter, tres novos espirómetros e un novo desfibrilador.
