Os algoritmos de recoñecemento facial teñen que adaptarse ao uso de máscaras

martes, 28 de xullo do 2020 Marcus Fernández

O Instituto Nacional de Tecnoloxía e Estándares (NIST dos EE.UU. realizou un estudo sobre o uso de algoritmos de recoñecemento facial desenvolvidos antes da COVID-19 en persoas con máscara, desvelando erros de recoñecemento de entre o 5 e o 50% (cando sen máscara a taxa de erro é do 0,3%), desvelando detalles sumamente curiosos como que o recoñecemento funciona peor con máscaras negras que con máscaras azuis, así como o feito de que os algoritmos fallan máis canto máis cubramos o nariz coa máscara.
Actualmente están a traballar en algoritmos de recoñecemento para persoas con máscara, pero resulta interesante ver como os algoritmos actualmente dispoñibles fallan, e de que xeito, para tomar decisións en base a esta información.
Dende NIST fixeron probas con sistemas de recoñecemento un-a-un, que son os que normalmente se empregan en fronteiras e sistemas de control de pasaportes, onde os algoritmos teñen que comprobar se a cara dunha persoa coincide coa da súa documentación, reto que agora é moito máis complexo por mor do uso de máscaras que cobren a boca e o nariz, o que é unha grande preocupación para as axencias de seguridade de todo o mundo, e unha boa nova para as entidades que avogan pola defensa da privacidade.
En calquera caso, espérase que nos vindeiros meses melloren considerablemente os sistemas de recoñecemento facial centrándose en identificar máis detalles no contorno dos ollos, o que fará que o uso de máscara deixe de ser un problema para recoñecer a alguén.

Tenda de máscaras en Amazon

Un signo máis deste cambio de época é que Amazon incluso está a adaptar a súa tenda para a venda de máscaras, cando menos na súa versión británica, na que podemos atopar un espazo que facilita a localización de máscaras en función do seu tipo e do número de unidades á venda.
Esta tenda específica de Amazon chega agora que enténdese que as máscaras xa poden atoparse con normalidade no mercado, xa que anteriormente limitaban moitos destes produtos a centros sanitarios, para evitar o seu desabastecemento.

PUBLICIDADE