Os enxeñeiros informáticos convocan o I Premio Open Data

Bases para a presentación de candidaturas ao I Premio Open Data

Hoxe clausuráronse en Compostela as xornadas sobre administración electrónica que o Colexio Profesional de Enxeñaría en Informática de Galicia (CPEIG) celebrou para analizar a situación actual da eAdministración e a súa relación coa cidadanía, agora que as novas tecnoloxías xa forman parte imprescindible do noso día a día.
No acto de clausura participaron Manuel Botana Agra, o director do Centro de Estudos Cooperativos da USC; Emilia Vázquez Rozas, a decana da Facultade de Ciencias Económicas e Empresariais da USC, onde se desenvolveron as xornadas e, como non, o presidente do CPEIG, Fernando Suárez Lorenzo, quen aproveitou a ocasión para, entre outras cousas, anunciar a apertura da convocatoria do I Premio Open Data da entidade que preside, un evento dirixido a fomentar o coñecemento e potenciar o espírito emprendedor na nosa Comunidade.
Suárez Lorenzo apuntou na súa intervención que as iniciativas Open Data e RISP, “constitúen oportunidades de negocio para emprendedores, que poden crear novas aplicacións, servizos e produtos en base a esta información”, polo que convoca a tódalas persoas interesadas en participar a que presenten as súas candidaturas antes do vindeiro 31 de maio.
Segundo se indica na convocatoria, “o futuro encamíñase na dirección de modelos de negocio en liña que evolucionan constantemente para satisfacer a inmediatez e a personalización da demanda actual”.
Malia todo, e decidan ou non proxectar o negocio na Rede, as persoas interesadas en participar neste evento poden facelo nunhas xornadas que se celebrarán no vindeiro mes de xuño en Santiago de Compostela, e na que os emprendedores terán a oportunidade de defender os seus proxectos en público no marco do I Premio Open Data.
A dotación do premio é de 600€ para o proxecto gañador, 400€ para o segundo clasificado e 200€ para o terceiro, que de entrada xa lle virán moi ben ao emprendedor que os leve, para dar o primeiro paso firme na súa entrada ao mundo empresarial.