Os visores Meta Quest poderían ser o grande éxito tecnolóxico deste Nadal

Para dar datos de vendas normalmente temos que agardar á presentación de resultados trimestrais das compañías, pero hai un dato moi revelador da listaxe de aplicacións máis descargadas no iPhone tanto nos EE.UU. como a nivel mundial, na que emerxeu até a primeira posición a aplicación Meta Horizon.
A devandita aplicación é necesaria para a configuración dos visores Meta Quest, dando a entender que Papá Noel trouxo de agasallo en moitos fogares un visor Meta Quest 3 ou un dos máis económicos Meta Quest 3S (que cun prezo de 329,99 euros resulta moi axeitado para introducirse na realidade virtual dun xeito lúdico).
Resulta evidente que entre os usuarios de iPhone o volume de vendas dos visores de Meta é infinitamente superior ao dos Vision Pro de Apple, tanto polo feito de que a súa dispoñibilidade xeográfica é limitada, como porque o seu prezo europeo parte dos 3.999 euros (12 veces o que custa un visor de Meta).
Cómpre salientar que o feito de que as Vision Pro resulten un produto prohibitivo, pero que moitos usuarios desexan, provoque que as Meta Quest vendan ben, xa que son un bo punto de entrada ás posibilidades da realidade estendida.