Paulino González Pan, Enxeñeiro do Ano 2017 do COETG
luns, 25 de setembro do 2017 ,
Xa
vai quedando menos para o que sen dúbida é un dos nosos grandes
acontecementos tecnolóxicos anuais, tanto a nivel galego como
estatal. Falamos da Noite Galega das Telecomunicacións, que chega
este ano á súa edición XXII e que xirará, tematicamente, arredor
das moitas cousas que debemos saber (porque nos atinxen de xeito
directo) da ciberseguridade e da protección dos datos e das
infraestruturas. A cita, fixada para este venres 29, incluirá como
de costume a entrega dos premios que anualmente conceden a Asociación
e o Colexio Oficial de Enxeñeiros de Telecomunicación de Galicia
(AETG-COETG), organizador (tamén) da gala. Segundo
puidemos saber estes días, as entidades entregaralle ao colega de
profesión Paulino González o galardón de Enxeñeiro do Ano 2017.
As
orixes deste recoñecemento están na súa “exemplar traxectoria
profesional e no seu fondo compromiso co desenvolvemento do sector
das telecomunicacións no noso país”. A isto, engaden o colexio e
a asociación, cómpre sumar “o traballo realizado a prol do noso
colectivo”.
Segundo
lembran os organizadores, a Noite Galega das Telecomunicacións e da
Sociedade da Información terá lugar no recinto de PALEXCO (A
Coruña) e estará presidida polo presidente da Xunta de Galicia,
Alberto Núñez Feijoo. O evento comezará co habitual
cóctel-networking, que dará paso, no salón Arao, a un
espectáculo en cuxo transcurso entregaranse os Premios Galicia das
Telecomunicacións e da Sociedade da Información 2017.
Nesta
nova edición, amais do galardón de Enxeñeiro do Ano farase entrega
das distincións de Socia de Honra a Mar Pereira, directora da
Axencia para a Modernización Tecnolóxica de Galicia; Enxeñeiro
Gerardo García Campos á mellor iniciativa empresarial no sector TIC
a Situm Technologies; Gradiant á mellor tese doutoral aplicada ao
sector TIC a Alejandro Ramos Soto; ao Mellor Proxecto TIC con
Beneficios Sociais, outorgado en colaboración coa AMTEGA, a Balidea
Consulting & Programming; ao mellor expediente académico do
Máster en Enxeñería de Telecomunicación da Universidade de Vigo a
Víctor Manuel Segura Sieiro; e o premio Acuntia á empresa galega
que aposta polo desenvolvemento de infraestruturas intelixentes de
telecomunicacións a FINSA.