PéZcalo estrea tenda en Facebook

Hai poucas semanas comentamos que os galegos Javier Sousa e Iván Fociños estaban a desenvolver unha tenda en liña de artigos de pesca deportiva chamada PéZcalo, que busca converterse no referente do mercado e que, aparte de contar cun amplo catálogo, terá vocación social, o que veñen de deixar ben claro ao estrear a PeZshop, a tenda en liña de PéZcalo en Facebook, de xeito que o servizo fundado por Mark Zuckerberg será o primeiro escaparate desta iniciativa.
Esta tenda integrada en Facebook chega antes da apertura oficial de PéZcalo na web, o que supón un interesante adianto que serve para que os futuros clientes poidan comezar a probar o servizo e a adquirir produtos a través desta iniciativa de social shopping que presume de ser a primeira tenda española de pesca deportiva en Facebook.
Mentres PéZcalo non abre totalmente as súas portas na Rede continúa a ser posible subscribirse á súa newsletter para poder ter os gastos de envío de balde co primeiro pedido na súa tenda e tamén é posible facer un seguimento do proxecto a través dun blog aberto para tal fin.