Pechan a tenda de música en liña AllOfMP3

O Goberno ruso pechou a polémica tenda de música AllOfMP3, que destacaba por vender os temas a granel (e a un prezo bastante reducido), ante as presións dos EE.UU. que se negaban a que Rusia entrase na Organización Mundial de Comercio mentres a tenda estivese activa.
Ata o seu peche AllOfMP3 acadou preto de 6 millóns de usuarios que podían descargar discos e cancións a un prezo moito máis barato que outras tendas en liña. Así, por 0,20 dólares (ou menos) se podían mercar as cancións para a súa descarga (e sen contar con proteccións DRM) destacando o enorme fondo do catálogo ofrecido grazas, en boa medida, polas diferenzas entre a lexislación rusa e a norteamericana no tocante ós dereitos de autor (polo que a web era totalmente legal, aínda que non gozase da aprobación das discográficas norteamericanas).
Os usuarios que empregaban o servizo ruso parece que non quedarán orfos, pois contan cunha especie de clon do mesmo, MP3sparks, que imitando a interface e os prezos podería repescar a moitos clientes de AllOfMP3.