Prince rexeita a Rede para distribuir o seu último traballo

O cantante e compositor estadounidense Prince, un dos primeiros grandes autores en lanzar un álbum por Internet, vén de novo de saltar á palestra, facendo alarde dos seus bruscos cambios de personalidade, ao predecir (sospeitosamente) “a fin da música por Internet” e ao calificar a Rede como “completamente caduca”, poñendo en dúbida servizos tan populares como a mesma iTunes.
Este recoñecido artista, que paradoxicamente botou man da Rede para promocionar e distribuír un dos seus anteriores discos, vai repartir o seu último traballo, titulado 20Ten, en exclusiva de balde cos exemplares do diario Daily Mirror.
Trátase do segundo álbum do controvertido autor logo de Planet Earth, distribuído na edición dominical da publicación británica.
Prince prefire, ao parecer, regalar a súa música antes que distribuíla por Internet (algo que por outra banda tamén se agradece, sobre todo se o fai de balde), porén considerar a Rede como unha “plataforma en vías de extinción” comparándoa coa canle de televisión de vídeos musicais MTV é un atrevemento digno das cabezas máis tolas.
As declaración de Prince, realizadas ao diario que distribuirá o seu último traballo a finais de mes, veñen de prender a mecha na Rede ao afirmar que, “non me pagan por adiantado e logo enfuréncense cando non poden dispor das cancións”.
Este autor, que chegou a acusar xudicialmente aos seus propios fans de “violar os seus dereitos de autor” por empregar imaxes súas como avatares, tampouco se leva ben coas grandes produtoras como a Warner Music (con quen rifou a finais dos 90) co que distribuir de balde os seus discos para intentar xuntar xente para os concertos, semella a mellor (e única) opción que lle queda ao artista.