Proseguen en Pontevedra as xornadas de TICs para empresas que organiza Autónomos de Galicia (OAP)

Sobrevivir ou non no mercado empresarial depende en ocasións dunha serie de miúdos detalles que inclinan a balanza ó noso favor, e cada vez son máis as entidades diversas que sinalan que a aposta polas novas tecnoloxías da información vén a ser como asegurar ese movemento da balanza cara a onde nos interesa. Esta é precisamente unha das principais mensaxes que está a lanzar estes días a Federación de Profesionais e Autónomos de Galicia, OAP-Galicia, que segue adiante coa celebración dunhas xornadas de formación sobre comercio electrónico, factura electrónica (estas dúas en colaboración con HOSA) e novas tecnoloxías para as empresas.
Os encontros formativos, que están subvencionados pola Dirección Xeral de Promoción Industrial, desenvolvéronse xa en Marín, Dena, A Guarda, Vigo e Vilagarcía, estando previsto agora o traslado a Pontevedra. Este venres 9 dan comezo as sesións na cidade do Lérez cunha xornada sobre comercio electrónico. O día 16 é a quenda da factura electrónica e o 23 de novembro chega a sesión sobre as novas tecnoloxías nas pemes. Todas as xornadas celebraranse na Academia de Oposicións Paufer, na rúa Campo de la Torre nº 20, de 17:00 a 20:00 horas.
O obxectivo desta oferta formativa é o de ampliar a formación dos traballadores autónomos e as pequenas e medianas empresas no eido das TICs. Todos os cursos potencian a participación de mulleres, cun mínimo de asistencia de mulleres traballadoras do 33%, e asemade a participación dos profesionais maiores de 45 anos.