Quefacer.com: buscador galego de lecer con feitura de rede social

Temos nova web galega á vista: quefacer.com. Tal e como se advirte no seu propio nome e segundo nos contan os seus responsables, estamos ante un recurso que nos vai axudar a artellar o noso tempo de lecer, cousa que se agradece. En primeiro lugar, porque a Rede é unha enleada de axendas, e sempre está ben que haxa recursos que clarifiquen, sinteticen e ordenen. En segundo lugar, porque sempre haberá cousas que se nos escapen. A vantaxe deste novo buscador, ademais, radica en que é unha rede social. Creada por Ramón Iglesias e Alberto Freaza, dous mozos da comarca de Vigo, a web permite facermos cousas como buscar eventos sen necesidade de estarmos rexistrados.
Asemade, permítenos publicar de xeito simultáneo en Facebook, evitando duplicidades de traballo e posibilitándonos tirar o máximo proveito de recursos para promover o noso evento. A gran arela de Ramón e Alberto foi achegar algo que fose claro e útil. Ou sexa, sinxelo e potente. “Trátase de atopar o que queres”, informan, “cando queiras, onde queiras e sen esforzo”. Ademais, a web é de balde.
Quefacer.com está orientada a persoas ou organizacións que acheguen eventos ou servizos de lecer como restaurantes, cafeterías, artistas, asociacións, teatros, colectivos de toda índole, federacións, etc. “A outra cara da mesma moeda”, engaden, “son aquelas persoas que desexan coñecer as actividades que poden levar a cabo, como por exemplo saír a cear, cursos, festas populares, concertos”. Por outra banda, a idea tamén foi a de achegarlles utilidade ás plataformas que se dedican a informar sobre a oferta cultural, así como prensa, oficinas de turismo, foros, páxinas web. Para sabermos máis desta web e as súas potencialidades temos dous vieiros fundamentais ao noso alcance: vendo o vídeo explicativo ao que dá acubillo o buscador ou ben acudindo ao acto de presentación previsto para esta semana en Redondela, este xoves 12 de abril, ás 19.00 horas no Multiusos.

Vídeo promocional de Quefacer.com