Quobis acolleu a presentación dun proxecto para optimizar a industria con tecnoloxías intelixentes: o proxecto COMPORT
mércores, 15 de decembro do 2021
Este
martes 14 celebrouse no Porriño a presentación dun proxecto para
estender as tecnoloxías disruptivas no ámbito industrial. A cita
foi no Porriño, nas instalacións da empresa tecnolóxica Quobis
(Polígono da Granxa), co-responsábel do proxecto en cuestión,
COMPORT (COMmunications for Process Optimization in Real Time),
subvencionado pola axencia GAIN (Axencia Galega de Innovación) a
través do programa Conecta HUBS 2021. COMPORT conta coa
participación do consorcio de empresas Quobis, Sixtema, Situm,
Torusware e Edigal.
Durante
a presentación os representantes das ditas empresas presentaron as
principais liñas de traballo e os obxectivos particulares do
proxecto, que pasan por “xerar unha solución para que os
principais actores do sector industrial reduzan os seus custos de
produción dunha forma substancial a través do uso de tecnoloxías
facilitadoras (Internet Industrial das Cousas -IIoT-, Intelixencia
Artificial -IA- e Aprendizaxe Máquina -ML-) que dean como resultado
“unha redución no tempo medio de resolución de incidencias e a
súa asignación proactiva”, informaron.
Esta
solución consistirá nunha plataforma de software industrial baseada
no devandito paradigma do IIoT que fará uso de Intelixencia
Artificial (IA) e o Machine Learning (ML) para a optimización
de procesos industriais, coas comunicacións en tempo real como
vehículo para a toma de decisións informada e inmediata.
Ademais,
COMPORT pon o foco na resolución temperá de incidencias en
contextos industriais buscando a mellora da fiabilidade dos sistemas
críticos na fabricación. Neste punto en concreto, a finalidade é
“incrementar o tempo efectivo de actividade dos servizos e, en
consecuencia, obter unha mellor produtividade nos procesos de
fabricación”.
Na
presentación fíxose saber que o proxecto “supón un novo empuxe
ao IIoT e integra o uso de tecnoloxías de última xeración,
integrando analítica de datos, mobilidade, fabricación flexíbel,
Realidade Aumentada, seguridade, comunicacións en tempo real e
Intelixencia Artificial, nun claro exercicio de converxencia entre as
principais liñas estratéxicas en innovación definidas actualmente
polas institucións públicas e os intereses dos principais actores
industriais”.