R e APD renovan o seu traballo conxunto a prol da transformación empresarial

venres, 27 de setembro do 2019 Fernando Sarasketa

R vén de renovar o seu acordo coa Asociación para o Progreso da Dirección (APD), entidade de ámbito estatal que ten unha longa e rica bagaxe en formación, divulgación e networking ligado ás novas tecnoloxías, a Industria 4.0, a intelixencia nos negocios e a transformación dixital. Na renovación da alianza, formalizada na sede da operadora na Coruña, participaron Santiago Sesto, director de APD zona noroeste (Galicia e Asturias) e Isidro Fernández de la Calle, director de Empresas do Grupo Euskaltel (do que forman parte R e Telecable).
Segundo fixeron saber, con este novo convenio actualízase a confianza e a colaboración que xa viñan mantendo a empresa e a asociación para xerar valor nos membros da comunidade empresarial e nas empresas. Ao abeiro do acordo, ademais, poranse en xogo iniciativas para fomentar o intercambio de coñecementos e experiencias das persoas que desenvolven tarefas de alta dirección no sector produtivo, “un obxectivo extensíbel tanto a entidades privadas como públicas e tendo en conta a profesionais que interveñan directamente ou de maneira delegada no goberno ou administración das compañías e organismos”, engadiron.
Entre as actividades concretas que se van desenvolver tanto en Galicia como en Asturias salientan os xantares-coloquio do Club CEO, encamiñados á alta dirección das empresas. Nestas xeiras de traballo ofrecerase o relatorio dun director executivo (un CEO polas súas siglas en inglés) arredor dun tema de actualidade empresarial ou sobre novas tecnoloxías e dixitalización.
Celebraranse tamén en ambos os dous territorios os chamados Encontros de tecnoloxía e negocio, na mesma liña de contactos con expertos en foros onde se debate acerca de solucións a retos do mundo actual.
Ademais, R incluirá as súas charlas didácticas sobre novas tecnoloxías e os obradoiros de robótica Crea R en APD Kids, o programa da asociación que persegue divulgar o coñecemento entre os/as máis pequenos/as de maneira divertida e práctica.

PUBLICIDADE