R sitúase como o operador español mellor valorado polos consumidores

luns, 10 de decembro do 2007 Raquel Noya

Por segundo ano consecutivo, os consumidores veñen de escoller ó operador galego R como o provedor de Internet mellor valorado en España. Así se recolle na segunda parte dun estudo internacional sobre provedores de Internet que vén de publicar a revista Compra Maestra da OCU no pasado mes de outubro.
O devandito estudo revela que un 82 por cento dos consumidores “recomendarían (o 42 por cento con toda seguridade e o 40 por cento probablemente) os servizos de Internet deste operador a un amigo”.
Comparativamente e segundo a dita investigación, esta porcentaxe é a máis elevada de toda España e supera nun 17% o índice acadado por Telefónica, o segundo operador que máis recomendarían os usuarios.
A análise, levada a cabo entre 1.152 enquisados de toda España de idades comprendidas entre os 18 e os 74 anos, tamén salienta a R como o máis rápido para os clientes á hora de darse de alta, por diante de ONO e Euskaltel, e unha distancia considerable do resto dos operadores que operan no noso país.
Asemade, o operador galego, tamén destacou neste estudo pola súa velocidade de conexión e o baixo índice de desconexións, situándose, tamén neste eido, nos primeiros postos en canto a rigor de facturación e atención ó cliente.

PUBLICIDADE