Recoñecen a falsidade das contas de GOWEX

GOWEX, a compañía española que ofrece redes Wi-Fi de balde por todo o mundo dende hai 15 anos, que tiña como obxectivo chegar a 600 cidades para 2018 e que presumía duns ingresos de 182,6 millóns de euros en 2013, veu como un comunicado de Gotham City Research poñía en dúbida os seus datos económicos e valoraba o prezo da súa participación en 0 euros, por considerar que o 90% dos ingresos da compañía son ficticios, establecendo unha comparación co caso Pescanova, o que provocou un grande descrédito para GOWEX, que publicou unha nota de prensa na que defendía as súas cifras de negocio, o que non foi suficiente para manter a farsa, e finalmente tivo que saír o presidente da compañía, Jenaro García Martín, a confesar a “autoría desta falsidade”.
García Martín presentou a súa dimisión á cabeza da compañía especializada na creación de redes Wi-Fi cidadás e admitiu que a empresa non pode facer fronte ás débedas contraídas. O presidente de GOWEX sería o principal responsable da falsidade nos números da compañía durante, cando menos, os catro últimos anos de actividade, o que provocou a perda de confianza no Mercado Alternativo Bolsista no que a empresa cotizaba, por deixar en evidencia a súa falta de control (ocasionando unha caída das cotizacións das empresas en tal mercado de até un 23%).
A empresa ten que entrar agora en concurso de acredores voluntario, á vez que se intentarán tomar outras medidas para preservar os intereses da compañía. Entre as débedas da compañía destacan importantes cantidades achegadas de fondos públicos, como 8,92 millóns de euros do ICO, 4,8 millóns do Ministerio de Industria e 420.042 euros do Centro para o Desenvolvemento Tecnolóxico Industrial (Ministerio de Economía), aos que sumaríanse 6 millóns de euros do Banco Europeo de Investimentos e o Fondo Europeo de Investimentos.
Os propios traballadores manifestaron nun comunicado oficial estar “en estado de shock absoluto”, pois non crían as denuncias de Gotham e confiaban nas contas de GOWEX, polo que rexeitan toda ligazón coa fraude e aseguran que continúan nos seus postos de traballos dando servizo aos seus clientes con normalidade, aínda que entidades como Metro de Madrid xa anunciaron que cancelaban o proxecto piloto co que GOWEX ía subministrar Wi-Fi aos usuarios do servizo de transporte madrileño, servizo que sairá a concurso no futuro. Polo momento, o único proxecto de GOWEX en Galicia, o da cidade de Ourense, parece manterse con normalidade (o contrato actual seguiría en vigor até 2016), non tendo adoptado o Concello ningunha decisión ao respecto.