Red.es patrocina un curso sobre Cibercidadanía e novos dereitos humanos

A entidade do Ministerio de Industria, Turismo e Comercio, Red.es vén de anunciar que, nos vindeiros meses, vai participar de xeito activo nos Cursos de Verán 2008 do Escorial, organizados pola Universidade Complutense, co patrocinio da materia Cibercidadanía e dereitos dixitais: Ciberespacio, gobernanza global e novos dereitos humanos que forma parte, por primeira vez, desta programación.
Este curso, que foi deseñado e organizado polo Foro de Investigación e Acción Participativa para o desenvolvemento da Sociedade do Coñecemento (Fiap), estará dirixido por Rafael Casado, presidente do devandito Foro, e nel participarán relatores de recoñecido prestixio internacional entre os que se atopan Langdon Winner, Saskia Sassen e Fernando Vallespin.
O obxectivo do curso, que terá lugar en San Lorenzo do Escorial do vindeiro 7 ao 11 de xullo, será afondar no estudo e na análise das relacións entre dereitos humanos, tecnoloxía e democracia así como na relación entre o emprego de Internet, as políticas de inclusión dixital e o desenvolvemento da “gobernanza electrónica nun cibermundo en construción”, identificando os factores que supoñen un cambio real na definición dos límites da democracia e do concepto de cidadanía e dos novos dereitos.
As solicitudes de matrícula para asistir a esta actividade deberán tramitarse na web oficial dos Cursos de Verán do Escorial antes do vindeiro 7 de xullo e, debido a que as prazas están limitadas nas súas distintas modalidades, a selección dos asistentes realizaranse atendendo á orde de solicitude.
O curso terá o recoñecemento de dous créditos de libre elección.