Ribeira estrea unha tecnoloxía de Avansig co obxectivo de subirse ao carro das Smart Cities
xoves, 26 de xuño do 2014
A empresa galega Avansig,
que recentemente amosou en Santiago o potencial da súa ferramenta
csUrbanismo (un
recurso de utilidade con información xeográfica integral para a
xestión de proxectos urbanísticos), vén de desenvolver un novo
proxecto tecnolóxico inserido tamén no eido das Smart Cities.
Desta volta, trátase dun proxecto de implantación TIC nun concello
concreto, o concello coruñés de Ribeira, onde Avansig puxo en
marcha unha plataforma (Smart Ribeira) que, en palabras da empresa,
converterá a localidade nunha Cidade Intelixente en toda regra.
Grazas a este recurso, tanto cidadáns como visitantes poderán
realizar todo tipo de trámites e xestións municipais a través de
Internet e teléfonos intelixentes.
Por certo que en virtude
deste proceso de implantación, o municipio de Ribeira é o primeiro
en integrar unha ferramenta desenvolvida con tecnoloxía City
Juice, unha aplicación de Avansig para a xestión e difusión de
datos xeográficos baseada en tecnoloxía SIX (Sistemas de
Información Xeográfica).
Nun plano máis
detallado, a plataforma consta dunha aplicación móbil e unha páxina
web, onde a cidadanía de Ribeira poderá atopar de xeito “rápido
e eficiente” os servizos que ofrece o Concello, amais de “ter a
oportunidade de realizar numerosos trámites administrativos e
comunicar incidencias a través dos móbiles”, informan os
responsábeis de Avansig, que tamén salientan quen entre os servizos
máis destacados que se poderán levar a cabo en liña atópase a
reserva de instalacións municipais e a participación cidadá en
asuntos da realidade municipal. Igualmente, a tecnoloxía City Juice
permitirá que os comerciantes locais promovan os seus negocios e
ofrezan información básica sobre os mesmos, así como incluír
ofertas a través da aplicación móbil e da propia web.
Por outra banda, a
plataforma tamén está concibida para fornecer información sobre os
recursos culturais e naturais de Ribeira, as súas festividades e as
súas actividades de lecer. Deste xeito, os visitantes terán no seu
teléfono “todos os detalles relativos a aparcadoiros, paradas e
liñas de transporte, así como a información acerca das diferentes
rutas turísticas, puntos de interese, aloxamentos e establecementos
de hostalaría”.
Os traballos
desenvolvidos en Ribeira por Avansig baseáronse como dixemos na
implantación de tecnoloxía City Juice nunha aplicación específica
desenvolvida á medida do concello e con versións para Android e
iOS. A idea de Avansig é aplicar estes recursos noutros concellos
galegos, adaptándose ás necesidades de cada un deles. Segundo
informa a empresa, “o uso de tecnoloxía SIX no panel de control de
City Juice permite unha xestión eficiente dos servizos municipais
por parte dos técnicos, grazas ás súas potentes capacidades de
análises e a centralización de toda a información espacial e
recursos cartográficos do municipio”. A plataforma Smart Ribeira
está xa dispoñíbel nas súas versións para
a cidadanía e para os
turistas.