SIVSA desenvolverá o sistema de xestión de axudas da Dirección Xeral de Patrimonio Natural

martes, 27 de novembro do 2018 Fernando Sarasketa

A empresa galega SIVSA vén de anunciar un novo e importante proxecto para o sector público que sumar aos máis recentes despregados para o Concello de Lugo (a plataforma tecnoloxía para dar forma e impulsar os orzamentos participativos) ou para a Consellería de Cultura e Educación (os máis de 5.000 novos portátiles para os colexios de Abalar). O proxecto dado a coñecer consiste nun contrato de servizo para a Consellería de Medio Ambiente, Territorio e Vivenda. Trátase dun novo sistema de xestión integral das axudas que tramita a Dirección Xeral de Patrimonio Natural.
Segundo fai saber a empresa con sede en Vigo, a aplicación incorporará un motor lixeiro de Business Process Management (BPM) que permitirá deseñar os fluxos de traballo relativos á tramitación das devanditas axudas e xestionar e facer seguimento do estado dos expedientes e dos procesos da entidade autonómica. SIVSA engade que “contará ademais cun módulo de reporting que permitirá xerar informes periódicos ou específicos, en función das necesidades da institución”.
Este novo contrato, formalizado en setembro a través da Axencia para a Modernización Tecnolóxica de Galicia (AMTEGA), inclúe tamén o soporte técnico e o mantemento da aplicación, e conta cun prazo de execución de 12 meses e un orzamento total de 106.249,80 euros.

PUBLICIDADE