SIVSA optimiza con tecnoloxía de seu a xestión de FAIN Ascensores

A galega SIVSA, referente do sector TIC, vén de informar dos detalles do seu traballo realizado para FAIN Ascensores, outra empresa destacada do panorama peninsular, aínda que centrada no eido da elevación. En termos concretos, a empresa con sede en Vigo dixitalizou os procedementos de xestión de ordes de traballo de FAIN Ascensores, e fíxoo co desenvolvemento e implantación dunha nova aplicación móbil e unha ferramenta de back office web de apoio á xestión do negocio. Con estes recursos, informa SIVA, logrouse automatizar e axilizar o fluxo de traballo e aumentar a produtividade.
En termos concretos e para facernos unha idea do alcance do traballo, a materialización e posta en marcha deste novo sistema de mobilidade permite a FAIN Ascensores xestionar máis de 55.000 ordes de traballo ao mes, reducindo os tempos de resposta en caso de avarías e optimizando os labores de mantemento preventivo de equipos.
A solución, baseada en tecnoloxía Google Cloud Platform e desenvolvida con metodoloxía Agile, permite visualizar en tempo real a localización dos técnicos de campo e confrontar esta información cos avisos de incidencias recibidos para asignar ordes de traballo e administrar así os recursos de forma eficiente. Segundo informa SIVSA, tamén posibilita facer seguimento e monitoraxe, “minuto a minuto”, do progreso das accións preventivas e correctivas en marcha, amais de elaborar informes diarios e mensuais de seguimento para cumprir cos obxectivos de calidade do servizo marcados ou introducir optimizacións.
Respecto da repercusión humana das tecnoloxías materializadas pola empresa galega, a día de hoxe xa hai máis de 350 técnicos de campo e un centenar de responsábeis dos departamentos Comercial, Técnico e de Xestión de 27 delegacións de FAIN Ascensores operando xa con este novo sistema de SIVSA, que engade que a nova ferramenta posibilita, ademais, que os devanditos axentes de campo poidan incluír anotacións, comentarios e fotografías nas ordes de traballo sobre necesidades de material, o tipo de servizos prestados ou os motivos de peche do traballo. Isto faise a través de formularios que se integran de maneira automática no sistema da empresa, “de tal forma que poden ser consultados en calquera intre e lugar, diminuíndo os riscos comúns ligados aos formularios manuais, como perdas de información ou erros de envío”.
Amais do devandito e en virtude dun sistema GPS e de optimización de rutas, conecta a orde de traballo co enderezo do aviso. Polo tanto, os técnicos de campo poden dispor de forma inmediata de información sobre a ruta máis curta e directa para chegar ao destino.