Samsung actualiza o asistente de voz dos seus televisores

Samsung anunciou a chegada a España da actualización da función Bixby con intelixencia artificial na gama de televisores de 2025 (modelos Neo QLED, OLED, The Frame e QLED), coa incorporación dun asistente de voz máis avanzado deseñado para facer a busca de información máis natural, intuitiva e fluída.
O novo Bixby permite conversar directamente co televisor, sen comandos nin menús, mesmo cando está apagado. Grazas á IA xerativa entende o contexto e ofrece respostas conversacionais, xa sexan datos xerais como «que altura ten o Everest?» ou recomendacións como «suxire listaxes de música relaxante para un día chuvioso». Ademais, pode responder cuestións sobre o contido que aparece en pantalla e amosar información relevante sen interromper a reprodución.
A función Click to Search tamén se ve reforzada, facilitando a exploración de entretemento en televisión en directo, xogos en liña, contidos en streaming ou Samsung TV Plus. Os usuarios poden preguntar por actores, programas ou temas concretos e recibir respostas inmediatas no propio televisor. Mesmo vai máis aló do que se mostra en pantalla, ofrecendo receitas, recomendacións de películas ou información práctica.
Outra das novidades é a integración co ecosistema SmartThings, que converte o televisor nun centro de control doméstico. A través de comandos de voz, pódese xestionar o forno, o aire acondicionado ou calquera outro electrodoméstico conectado.