Skechers comercializa zapatillas infantís con espazo para un AirTag

Os AirTags de Apple son dispositivos localizadores que podemos colocar en chaves, mochilas e outros obxectos que temamos extraviar, e aínda que a compañía de Cupertino destaque que non están deseñados para a localización de persoas (e incluso activasen funcións para dificultar o rastrexo persoal), a marca de calzado Skechers está a adaptar a súa liña de calzado deportivo infantil para os AirTags.
Falamos da colección Find My Skechers, que debaixo da soleta das zapatillas ten un compartimento pensado para agochar un AirTag ou outro localizador semellante, de xeito que será posible localizar a zapatilla empregando a aplicación Buscar do iPhone. Cómpre lembrar que o sistema de localización non está baseado en GPS, senón en Bluetooth e nunha rede de localización mediante dispositivos móbiles compatibles, polo que está lonxe de sistemas de localización como os baseados en reloxos conectados (aínda que teñen a comodidade da batería de longa duración, de xeito que non hai que estar pendentes da súa recarga).
As zapatillas de Skechers que contan con esa opción son os modelos GO RUN Elevate 2.0, dispoñibles con deseños para nenos e nenas en talles entre o 21 e o 37 e a un prezo de 55-60 euros.