SmartPEME pon en marcha sete obradoiros en liña para seguir formándonos en tempos de pandemia

SmartPEME, o programa de asesoramento tecnolóxico da Deputación de Pontevedra, comezou esta semana ofrecendo sete novas accións formativas impartidas, co obxectivo de sortear as circunstancias do Decreto de Alarma, de xeito telemático. Os cursos, que contan con 10 prazas cada un, versan sobre xestión de redes sociais ou blogs, ferramentas para a mellora de páxinas web, ciberseguridade, redacción publicitaria, ferramentas para empresas turísticas, promoción de empresas ou técnicas de mercadotecnia (marketing).
O programa comezou este luns con Promociona o teu Negocio con Google My Business, con Adrián Fernández, licenciado en Comunicación Audiovisual pola Universidade de Barcelona, e Optimización de Imaxes: Mellora a Velocidade da túa Web, con Lara Taboada, titulada superior en Ensinos Artísticos de Deseño Gráfico e profesora. Pola súa banda, o martes 27 Fátima Faílde, licenciada en Publicidade e Relacións Públicas pola Universidade de Vigo, impartirá Como Vender en Vinted.
O mércores 29 de abril celebraranse dous novos obradoiros: Como Vender os teus Produtos nun Marketplace, impartido por María Aller, licenciada en Publicidade e Relacións Públicas pola Universidade de Vigo, e Como Mellorar a Reputación en Liña do teu Establecemento Turístico, por Sonia Torres, técnica de Empresas e Actividades Turísticas pola Universidade da Coruña.
Por último, o xoves 30 de abril impartiranse os obradoiros Vende os teus Produtos en Facebook e Instagram con Laura Carrera, graduada en Publicidade e Relacións Públicas, e Intelixencia Artificial: Que É e Como Funciona, impartido por Manuel Freire, experto universitario en Robótica.