TP-Link lanza unha pechadura conectada económica

Nun momento no que a domótica está a coller moita forza, varios fabricantes comercializan pechaduras conectadas á Internet ofrecendo funcións moi diversas, aínda que con prezos bastante elevados, de aí que sorprenda a última proposta de TP-Link, que vén de lanzar unha nova pechadura conectada dentro da súa liña Tapo a un prezo de 69,99 dólares nos EE.UU.
A pechadura Tapo DL100 pode sorprender porque, pese a un prezo tan axustado, ofrece varios métodos de desbloqueo, incluíndo teclado numérico, chave física, aplicación móbil Tapo e control por voz mediante asistentes como Alexa, Siri, Google Assistant e Samsung SmartThings.
Queda por ver se chegaremos a ver este produto en Europa, pero a priori semella que sería a opción máis económica do mercado, o que sorprende por chegar dunha man recoñecida como TP-Link, marca que ten outras pechaduras máis avanzadas e tamén videoporteiros.
En canto á autonomía, estímase que ten unha duración de ata sete meses con Wi-Fi activado e ata dez meses usando só Bluetooth, con só catro baterías AA, permitindo tamén alimentación USB-C en caso de emerxencia.
A nivel de seguridade, inclúe funcións como a ocultación do PIN, permitindo inserir o código de acceso como parte dunha cadea máis longa de números para despistar ollos indiscretos. Tamén permite crear códigos dun só uso para visitas ou códigos restrinxidos por horario para profesionais do servizo técnico.
Ademais, o DL100 pode integrarse co timbre intelixente Tapo, permitindo desbloquear a porta mentres ves en directo quen está fóra. A aplicación móbil tamén envía notificacións ao bloquear ou desbloquear a porta e mantén un rexistro detallado de accesos, incluíndo os códigos utilizados por usuarios específicos. Tamén conta con resistencia IP54.