Telecomunicación de Vigo presenta a súa propia rede de mecenas con 16 empresas TIC
venres, 12 de maio do 2023
Este mércores 10 de maio a Escola de Enxeñaría de Telecomunicación
de Vigo presentaba a súa iniciativa Conexión
Teleco, trátase da súa propia
rede de mecenas, da que xa forman parte 16 entidades, incluíndo
empresas e centros tecnolóxicos co obxectivo de facer
máis doada a interacción entre estes 16 organismos que procuran
novos talentos para os seus equipos e o alumnado do centro, facendo
fincapé nos que están a piques de comezar a súa vida laboral.
A
nova rede presentábase este mércores no edificio Redeiras coa
presenza do reitor, Manuel Reigosa; a directora da escola, Rebeca
Díaz, e varias das persoas que exercerán de mecenas: Ruth Escarda,
xerente técnica en Indra T&D e responsábel da empresa en Vigo;
Telmo Calle, director do centro técnico en electrónica na
multinacional da automoción BorgWarner, e Roberto Pérez, socio
consultor de Optare Solutions.
“Somos unha universidade moderna que quere fornecer de talento á
súa contorna e, neste sentido, Conexión Teleco vainos permitir unha
dobre vantaxe: por unha banda, é bo para a escola, xa que facilita
que as alumnas e alumnos teñan conexión de primeira man co traballo
que van realizar no futuro e, pola outra, é bo para estas 16
empresas, xa que acceden de xeito directo a todo o talento que agroma
nas nosas aulas”, explicou o reitor ante os representantes das
empresas e centros tecnolóxicos participantes. “A colaboración
público-privada é importantísima para o país”, recalcoulles
Reigosa, ao tempo que os animou a tirar proveito desta iniciativa na
captación de talento e tamén no desenvolvemento de programas de
I+D+i.
Asemade, a directora da escola, Rebeca Díaz, explicou que por medio
desta iniciativa búscase a excelencia na formación de profesionais
da Telecomunicación, atraendo estudantes que aínda non se
matricularon na universidade, potenciando o interese e premiando o
esforzo do estudantado que está en proceso de formación”,
explicou a directora da escola, Rebeca Díaz.
Cómpre engadir que as compañías e organismos de investigación do
sector precisan profesionais do perfil das persoas que se forman na
ETT é, neste senso, recoñecen que se trata dun dos seus principais
viveiros. “Participar en Conexión Teleco permítelles ter unha
maior presencia no centro e, por tanto, estreitar a súa relación co
estudantado”, insistiu Díaz, quen tamén apuntou que “a día de
hoxe o cen por cen do noso alumnado fai prácticas en empresas”.
As entidades que participan na rede Conexión Teleco poden facelo de
dous xeitos, segundo sexan as súas achegas ao proxecto: amigas
ou mecenas. Arestora conforman a rede 11 entidades mecenas:
BorgWarner, Centum Research & technology, Optare Solutions,
Indra, Quobis, Televés corporation, Marine Instruments, Gradiant,
CTAG, R e Atlanttic; e cinco entidades amigas: Muutech,
Everis, GB Tech, Balidea e Imatia. Todas estas entidades
comprométense a ofrecer prácticas profesionais ás alumnas e
alumnos da escola. Nesta liña, cada unha elaborou cadanseu vídeo,
de arredor de cinco minutos, nos que contan en primeira persoa en que
sector son líderes (Intelixencia Artificial, ciberseguridade,
desenvolvemento e implantación de software a medida, etc) e as
razóns polas que lle interesan contratar persoas tituladas en
Enxeñaría de Telecomunicación da EET da UVigo.
Alén disto, as entidades mecenas, adquiren compromisos de
patrocinio de actividades e premios, tales como premios a estudantes
de primeiro curso co mellor expediente académico (galardóns de
recente implantación); premios aos mellores traballos do Laboratorio
de Proxectos (Premios LPro); ou galardóns para os mellores traballos
de fin de titulación, entre outros.
Dende a escola barállase outra iniciativa de mecenado, como as
Olimpíadas nacionais de telecomunicación, das que a escola é
coorganizadora; os actos de graduación, tanto de grao como de
mestrado, ou calquera outra actividade que poida xurdir no eido da
divulgación e a captación de estudantado.
Dende a EET de Vigo anuncian a posibilidade de pór en marcha unha
nova titulación con mención dual no ámbito TIC, algo no que se
está a traballar. Segundo o reitor, o día 31 remata o prazo de
alegacións do proxecto galego de educación dual na universidade; un
grao dual, “no que estarán as empresas dende o principio, asumindo
compromisos para que o final da formación se faga xa dentro da
empresa”.