Telefónica, Orange, Mapfre e Ausum mostran en Santiago o vieiro da transformación empresarial

Este xoves a Cámara de Comercio de Santiago celebra na súa sede (número 44 da rúa San Pedro de Mezonzo) a xornada A dixitalización como panca de conectividade na PEME, un encontro empresarial destinado a pór de relevo ante as empresas a necesidade de transformárense e innovar: tanto a nivel de produción como en xestión, comunicación, mercadotecnia, análise de mercados ou distribución.
Na cita, que comeza ás 9.30, daranse a coñecer as principais conclusións do Informe España Empresa Dixital e brindarase un punto de encontro para o intercambio de recursos e achados en materia de transformación. Participarán empresas como Telefónica, Mapfre, Orange e Ausum Asesores e Avogados Asociados expoñendo experiencias propias de éxito.
Amais, a cita acollerá unha mesa redonda sobre a mellora da competitividade e produtividade das pequenas e medianas empresas a través das TIC.
As actividades do programa (accesible en PDF), como dixemos, darán comezo ás 9.30 coa sesión de apertura institucional a cargo de Rosa Mary Cardeso Trillo, secretaria xeral en funcións da Cámara de Comercio de Santiago, quen dará paso, sobre as 9.45 horas, á presentación do Informe España Empresa Dixital, a cargo de Carlos López Blanco, presidente da Comisión de Dixitalización da Cámara de España.
Sobre as 10.00 horas será a quenda de Marta Menéndez Martínez, directora en Galicia de Teléfonica, que achegará o relatorio Senón é agora, cando? É hora de transformarse. De seguido, sobre as 10.15, está previsto que interveña José Manuel Martínez Sainz, subdirector de Desenvolvemento de Negocio de Transformación Dixital de Mapfre, que falará sobre os recentes procesos de innovación da aseguradora.
Ás 10.30 horas está programado un relatorio de Gonzalo Echazarra, director de Empresas de Orange (zona norte), que fará un percorrido polos primeiros pasos que son precisos no proceso de transformación tecnolóxica dunha PEME.
Logo, sobre as 10.45, será a quenda da presentación do Programa TICCámaras, a cargo de Anselmo Díaz Romero, responsable do Departamento de Innovación da Cámara de Comercio de Santiago. Esta sesión incluirá a exposición de dous casos de éxito: Ausum Asesores e Abogados Asdos, a cargo de Diego Víboras Cabañero.
Sobre as 10.45 celebrarase a mesa redonda Como ser máis eficiente traballando na nube, na que van intervir Carlos López Blanco, Marta Menéndez Martínez, Andrés Peral Plaza (director de Seguridade e Medioambiente en Sistemas de Información de Mapfre), Richard Zabalo (partner account manager de Orange) e Diego Víboras Cabañero.
Rematarán os relatorios coa clausura institucional, a cargo de Fernando Pérez-Soba Aguilar, secretario accidental da Cámara de Comercio de Santiago. Máis tarde está prevista unha sesión de networking.