Telefónica convértese na primeira operadora en comercializar servizos 5G para empresas en España

Ambiente de Industria 4.0 nunha imaxe de iStock / Getty Images / B4LLS

Telefónica vén de facer historia na evolución recente das tecnoloxías móbiles. Faino converténdose na primeira operadora en España en comercializar solucións 5G para grandes empresas e administracións. Os primeiros usos desta tecnoloxía que ofrece a firma están baseados na incorporación de robots á industria para mellorar procesos e operacións; na asistencia remota para supervisión ou montaxe con atención de persoal experto en remoto; e no emprego de drons para tarefas de inspeccións en activos críticos e remotos, entre outras funcións.
80 casos de uso
A compañía despregou preto de 80 casos de uso probando as vantaxes desta tecnoloxía en todo tipo de sectores. O froito desta experiencia é o que agora a empresa pon a disposición de empresarios e xestores.
Telefónica quere adiantarse deste xeito ao que será unha demanda sen precedentes durante os vindeiros cinco anos: a demanda de conectividade 5G no sector industrial. As solucións que a operadora lanza ao mercado “permitirán aproveitar a nivel empresarial os beneficios que proporciona esta tecnoloxía, como son o incremento da velocidade na transmisión de voz e datos de até 10 Gb/s; a reserva temporal de largo de banda para a priorización de tráfico; a incorporación de redes privadas para unha contorna industrial e sobre unha rede pública; o incremento de até 1 millón de dispositivos conectados por quilómetro cadrado; a baixa latencia, que ofrece información en tempo real e reduce o tempo de resposta até o milisegundo e a seguridade, ofrecendo redes cifradas e libres de interferencias grazas ao uso da SIM e do espectro licenciado da SIM”, explicou a operadora.
Telefónica comezará o despregamento da 5G SA (Standalone) no 2022.
Os novos servizos comerciais que a empresa ofrecerá a partir de xaneiro teñen porán o foco, principalmente, no impulso da Industria 4.0. Farao grazas ás posibilidades que dan os servizos da rede 5G e que se incrementarán con novas funcionalidades no 2022, como son a utilización dun mesmo nodo radio para redes privadas e públicas; a priorización do tráfico privado sobre público e, tamén, a creación de redes privadas 5G con todas as funcionalidades do núcleo da rede 5G dedicado, “o que facilita unha menor latencia e un maior número de dispositivos conectados”.
As 3 primeiras propostas desenvolvidas por Telefónica Tech que comercializará da división de empresas son as seguintes:
- Robots AGV 5G: Esta solución está baseada nos vehículos guiados de forma autónoma para uso industrial (AGV) que se conectan a través dunha plataforma de visualización e planificación de rutas IoT, para xestionar a comunicación con eles de forma bidireccional, o que facilita a realización de tarefas repetitivas sen intervención humana, como é o desprazamento de cargas, 24 horas ao día, 7 días á semana.
- Solucións Asistencia Remota 5G: O servizo de asistencia remota, incluíndo opcionalmente a Realidade Aumentada, permite operar/reparar equipamentos en tempo real, sen necesidade de estar fisicamente na localización do sitio onde se está producindo a incidencia. Para iso, utilízase unha plataforma de monitoraxe e asistencia remota á que se conectan os dispositivos cos que se traballa, como un smartphone, unha tableta ou unhas smart glasses, que simplifican a operación do técnico en campo. Esta solución funciona tanto en rede 4G como en 5G, asegurando sobre esta tecnoloxía unha mellor calidade de servizo. Grazas a esta solución poderase, entre outras cousas, resolver mellor as incidencias ao contar coa axuda de expertos en tempo real e de forma remota, asegurando tempos de resposta e redución do impacto en produción.
- Solucións Drones 5G: A proposta de Telefónica inclúe drons multirrotor de á fixa ou VTOL (combinación de á fixa e despegamento, en aterraxe vertical), o uso de conectividade 4G ou 5G sobre dispositivos embarcados nos vehículos aéreos non tripulados (cámaras e outros sensores), unha plataforma de xestión de droes e voo (Fleet Management), servizos de xestión de autorizacións e de mantemento. Tamén se inclúe na proposta, o servizo de pilotaxe do propio dron e os servizos de data scientist con arquitectos de sistemas para analizar os datos recolleitos polos sensores dos vehículos aéreos ou mesmo, solucións de blockchain para certificar a xestión do voo e os datos extraídos (informes, certificacións, etc).
Telefónica ofrece tres modalidades de conectividade para pór en marcha estes servizos: Movistar Intranet 5G (soportada ao 100% sobre a rede pública de Telefónica, supón un menor investimento para a compañía que o contrata), Privada Virtual 5G (ofrece unha rede privada diferenciada e con cobertura específica, compartindo a infraestrutura do core da rede pública de Telefónica) e Privada Dedicada 5G (facilita unha rede privada 5G totalmente dedicada para aquelas empresas que necesitan o máximo nivel de seguridade e comunicación en tempo real).