Telefónica inicia unha profunda reestruturación
xoves, 28 de novembro do 2019
O Consello de Administración de Telefónica aprobou a
proposta do seu presidente executivo, José María Álvarez-Pallete, un novo plan
de acción que servirá para avanzar na transformación da compañía dando
prioridade aos mercados nos que a compañía poida ser máis relevante e buscando
un modelo sustentable de crecemento a longo prazo. Álvarez-Pallete asegura que
estamos ante «unha revolución tecnolóxica, pero tamén unha revolución social que
alterará o noso futuro inmediato», publicando tamén
unha carta aberta aos accionistas na que apunta que «as compañías que non
asuman a súa responsabilidade neste novo mundo deixarán de ser relevantes no
curto prazo».
Os cambios de Telefónica van ser profundos, centrándose en 5 decisións estratéxicas:
– Focalizar o investimento e crecemento
nos catro mercados máis importantes da compañía: España, Brasil, Alemaña e Reino
Unido
– A creación de Telefónica Tech
– A creación de Telefónica Infra
– Unha spin-off operativa baixo
unha única sociedade dos negocios en Hispanoamérica
– A redefinición do Centro Corporativo
Actualmente Telefónica está presente en 14 países, pero o 80% dos ingresos
proveñen de só 4, de aí que decidan priorizar os investimentos neses mercados,
mentres que a segregación dos negocios hispanoamericanos búscase optimizar os
recursos e atraer investidores, de xeito que a compañía estaría aberta a desprenderse
das súas filiais en países que non resultan rendibles.
A creación de Telefónica Tech supón a concentración dos negocios dixitais con
alto potencial de crecemento como a ciberseguridade, a Internet das Cousas, o
Big Data e os servizos na nube. A nova entidade acubillará así as unidades
dedicadas aos servizos indicados, como un xeito de focalizar máis a xestión e
conseguir atraer ao talento tecnolóxico axeitado.
Por outra banda, con Telefónica Infra búscase aglutinar as participacións
accionariais de Telefónica en vehículos de infraestruturas de comunicacións (como
a participación maioritaria en Telxius) dando servizos a terceiros operadores e
incorporando socios.
Vídeo coa presentación da nova Telefónica