Telefónica mantén o dividendo malia o relevante choque da COVID-19

Teléfonica vén de facer balance da súa actividade recente, achegando datos de interese sobre a incidencia que tivo, os meses pasados, a pandemia de COVID-19 sobre o seu medre e rendemento: un impacto limitado que non lle impide manter o dividendo. Segundo fai saber a operadora, se ben o Decreto de Alarma e o confinamento deixou pegada en parámetros como a actividade das redes da compañía (que “tiveron picos de tráfico sen precedentes”), as infraestruturas de seu demostraron unha vez máis a súa robustez e a súa fiabilidade. Polo que se refire aos ingresos, acadaron os 11.366 millóns de euros no primeiro trimestre do ano e reducíronse un 1,3% interanual en termos orgánicos (-5,1% reportado, principalmente polo efecto divisa).
A nivel internacional, os ingresos agregados dos catro operadores clave da compañía mantéñense estábeis en termos orgánicos, con crecementos do 3,8% en Alemaña e do 1,5% en Reino Unido.
Polo que respecta ás medidas postas en marcha para atallar a crise sanitaria e contribuír aos recursos da cidadanía para sobrelevar o confinamento (garantindo teletraballo, teleformación, comunicación de calidade, lecer no fogar, etc), a operadora puxo en marcha medidas como a creación dun fondo de 25 millóns para achegar equipos sanitarios e respiradores ás zonas máis afectadas, mercou 150 toneladas de equipamento sanitario e proporcionou aos seus clientes, gratuitamente e nos distintos países, un incremento de GB adicionais, así como un reforzamento da oferta de lecer e de contidos. Amais, no ámbito da educación, e a través de Profuturo (impulsado por Fundación Telefónica e Fundación a Caixa), doou 5.600 tabletas a familias en situación de vulnerabilidade con fillos en idade escolar, “para que poidan seguir formándose e aprendendo desde casa”.
Por outra banda, puxo a disposición das administracións e as institucións sanitarias as súas capacidades de Big Data e de xestión de datos anonimizados así como capacidades de atención telefónica ou dixital, entre outras medidas solidarias con institucións sociais e sanitarias.
Máis cifras
Volvendo ás cifras, a empresa anunciou que ten cubertos os vencementos de débeda dos vindeiros dous anos e conta cunha posición de liquidez de 22.500 millóns, da que 8.700M correspóndese cos activos líquidos dispoñíbeis. Tamén confirmou o dividendo anunciado para 2020 de 0,4 euros por acción.