Televés anuncia o cesamento temporal de actividades en Rusia

venres, 11 de marzo do 2022 S. P.

Ante os recentes acontecementos que se seguen desenvolvendo no conflito xeo-político do Leste de Europa, a empresa compostelá Televés vén de anunciar o cesamento temporal das súas actividades en Rusia.
Televés conta con presenza dunha filial de negocio situada no centro de Moscova, desde a súa apertura no 2014. A filial céntrase na comercialización de produtos relacionados coa distribución de sinal de televisión en edificios e fogares nos países da Federación de Rusia.
O cesamento de actividades vén motivado, en palabras da compañía tecnolóxica, “pola imposibilidade de garantir a operativa no tránsito de material e transaccións financeiras”, polo que suspende polo momento todas as actividades, comunicando o cesamento de subministración aos seus clientes en Rusia.
Televés céntrase agora exclusivamente en velar ao máximo polo benestar dos seus traballadores da filial.

PUBLICIDADE