TokApp lánzase á conquista de Latinoamérica afianzándose en media ducia de países

A empresa viguesa TokApp, responsábel da ferramenta global do mesmo nome para facilitar e mellorar a comunicación empresarial, vén de achegar unha serie de novidades sobre o seu proceso de espallamento nos ámbitos estatal e internacional. Un proceso que, por certo, tamén atinxe á súa filial TokApp School, aplicación destinada a evitar calquera tipo de incidencia comunicativa no eido escolar, ao tempo que achega rapidez e eficacia no intercambio de datos, contidos, mensaxes. Segundo nos conta TokApp, a empresa decidiu lanzarse á conquista de Latinoamérica e está a comezar a ser “unha aplicación imprescindíbel” en seis países do continente americano (México, Uruguai, Arxentina, Colombia, Costa Rica e Nicaragua).
Sen ir máis lonxe e como froito do interese xerado nestes mercados polas dúas aplicacións, a firma viguesa foi convidada a participar na feira ExpoPymes Internacional de México, que se celebra o 25 de agosto con presenza de empresas e entidades de Los Ángeles, Phoenix, San Antonio ou Chicago. Segundo conta TokApp, esta edición de Expopymes centrará os seus temas principais en enerxías limpas, industrias creativas e comunicación e innovación en turismo, comercio e educación.
Nun plano máis concreto, a arela de espallamento internacional da firma galega pasa por consolidar as dúas marcas nestes mercados e penetrar en sectores como o deporte, a cultura, o turismo, a saúde e “practicamente calquera sector que precise dunha comunicación directa cos seus clientes ou usuarios”. En palabras da empresa, TokApp “está chamado a ser un importante actor no ámbito da comunicación e as relacións empresariais e persoais en ámbalas beiras do Atlántico, especialmente pola súa clara vocación de ser unha ferramenta de comunicación útil e efectiva”, explica Javier Romero, conselleiro delegado de TokApp.
Romero engade que as previsións da compañía incrementan mesmo os datos deste ano, que triplicou a súa facturación anual respecto de 2015. Para 2018, TokApp prevé chegar ao millón de usuarios e ter presenza activa en 20 países.