Toledo confía en Altia para mellorar as súas capacidades de almacenamento dixital

xoves, 17 de decembro do 2020 Redacción

O Concello de Toledo elixiu a empresa galega Altia como partner para mellorar as súas capacidades de almacenamento dixital. O proxecto inclúe a implantación e configuración do novo sistema NAS (almacenamento conectado en rede) e, tamén, o mantemento e soporte técnico. Segundo informa a empresa tecnolóxica con sede en Oleiros, ten como obxectivo “evolucionar a anterior solución de almacenamento usada polo consistorio, reducir o tempo de backup empregado até agora e asegurar a recuperación ante desastres”.
O Concello, coa renovación das tecnoloxías empregadas para acubillar información, do hardware e do software de backup (copias de seguridade ou reserva), ten o obxectivo de acadar unha notábel redución de tempo nas copias de seguridade de todos os documentos que posúe.
Altia engade que as novas funcionalidades do software Veem Backup & Replication, na súa versión Enterprise, permitirán, por exemplo, “recuperar información específica de forma directa sen necesidade de rescatar todos os datos copiados nun momento determinado”. Neste senso, a empresa galega realizará todos os servizos vencellados á implantación e configuración do sistema; a provisión dos elementos necesarios; a instalación, configuración e posta en marcha do software de backup; a capacitación dos técnicos da organización e o mantemento e soporte técnico durante o cinco anos de duración do contrato.
O proxecto, no que o Concello de Toledo investiu máis de 66.500 euros, nace tras a necesidade de diminuír o tempo investido no proceso de copias completas. “Debido ao medre do volume de información a apoiar e ás limitacións da tecnoloxía utilizada, as xanelas de backup eran moi elevadas e o proceso de copia incremental tardaba máis cada día e case chegaba a xuntarse co seguinte proceso”, explicou Manuel Aranda, director asociado en Altia.

PUBLICIDADE