Torusware recibe o Premio Nacional de Informática polas súas contribucións na computación de altas prestacións

O equipo de Torus nunha imaxe de Víctor Echave para a Opinión da Coruña

Galicia volve ter un protagonismo especial nos Premios Nacionais de Informática, logo do recoñecemento achegado o ano pasado a Nieves Brisaboa (catedrática de Linguaxes e Sistemas Informáticos da Universidade da Coruña e investigadora principal do Laboratorio de Bases de Datos, adscrito ao CITIC) e este mesmo ano a Senén Barro (director científico do CiTIUS da USC). Os galardóns, acabados de fallar por vídeo-conferencia, tamén destacan nesta edición o labor e as contribucións da firma galega Torusware, spin-off da Universidade da Coruña e impulsada por investigadores do Centro de Investigación TIC (CITIC). A firma galega foi galardoada co Premio Nacional de Informática 2020 na categoría Premio Ramón Llull, que concede a Sociedade Científica Informática de España (SCIE) e a Fundación BBVA.
Torusware, cuxos socios promotores son os investigadores do CITIC Guillermo López Taboada, Juan Touriño Domínguez e Ramón Doallo Biempica, foi distinguida “pola súa actividade no ámbito da computación de altas prestacións e a súa aplicación ao procesamento de grandes volumes de datos, polo seu dinamismo e pola aposta polo I+D+i, e polo seu impacto nacional e internacional”.
Amais, na modalidade de Investigadores Informáticos Novos foi recoñecido Daniel Valcarce, enxeñeiro de software de Google que previamente desenvolveu o seu labor de investigación no CITIC.
Ademais, a tese doutoral doutro premiado, Adrián Pérez Diéguez, foi dirixida polos investigadores do CITIC Margarita Amor e Ramón Doallo.
O CITIC lembra que en edicións anteriores foron distinguidos un total de tres investigadores do dito centro coruñés. En 2019, Neves R. Brisaboa foi condecorada co Premio Nacional de Informática na categoría Premio Ángela Ruiz Carballos. En 2018, Ramón Doallo recibiu o Premio Aritmel, e nesa mesma edición, David Vilares foi galardoado co premio na modalidade Investigadores Informáticos Novos.