Tredess mostrará no NAB Show de Las Vegas as súas últimas solucións de radio e TV

A empresa galega Tredess, referente galego, estatal e internacional en materia de solucións de telecomunicacións a profesionais, confirmou a súa presenza na vindeira edición do NAB Show, que volve trala paréntese da pandemia (dous anos de inactividade) á súa sede de Las Vegas, Nevada, entre o 23 e o 27 de abril. Tredess contará cun stand de seu, o W5126 do West Hall, onde o equipo da firma compostelá presentará as súas novas solucións de radio e televisión.
Ás súas costas a empresa do Grupo Televés ten varios anos de “crecemento significativo e unha manchea de proxectos despregados en todo o mundo”, o que a converteu nun actor clave a nivel mundial en equipos e solucións de baixa potencia e en transmisores TDT de media potencia de até 5 KW arrefriados por aire.
Estas son algunhas das novidades que presentará Tredess en NAB:
-TRedess New ATSC3.0 Exciter, unha solución “moi potente e rendíbel” para que as emisoras de televisión migren á tecnoloxía NextGen TV.
-TRedess New Repetitor/ Gap Filler optimizado para a extensión SFN da cobertura en redes ATSC 3.0.
-TRedess MGNSS (un receptor GNSS multibanda e multiconstelación totalmente redundante).
-Novas funcións melloradas para redes DVB-T2 e ISDB-T: receptor SAT integrado con CAM/BISS e Remux e EWBS incorporados avanzados.