Trump pide a dimisión do máximo responsable de Intel

O presidente dos Estados Unidos, Donald J. Trump, pediu publicamente a dimisión «inmediata» do conselleiro delegado de Intel, Lip-Bu Tan, ao que acusa de ter vínculos problemáticos con China nunha mensaxe publicada en Truth Social. A petición resulta insólita, xa que non é habitual que un presidente reclame a marcha dun directivo dunha compañía privada.
Lip-Bu Tan, cidadán estadounidense de orixe malaia criado en Singapur, asumiu o cargo en Intel o pasado marzo co obxectivo de reverter a perda de liderado do histórico fabricante de chips, que recibiu miles de millóns de dólares do Goberno como parte do plan para reforzar a produción nacional de semiconductores. Hai poucos días anunciou recortes en investimentos en fabricación, medida que chega despois de reducir milleiros de postos de traballo.
As accións de Intel caeron máis dun 3 % tras as declaracións de Trump, que prepara unha suba de aranceis ao sector e que xa criticara a empresa noutras ocasións. O ataque do presidente recolleu as preocupacións do senador republicano Tom Cotton, que nunha carta ao consello de Intel advertiu de que as relacións de Tan poñen en dúbida a súa capacidade para xestionar fondos públicos e cumprir as normativas de seguridade.
A polémica engade incerteza a un momento clave para Intel e para o esforzo estadounidense de reforzar a súa capacidade de fabricación de chips, un obxectivo no que a empresa leva anos con dificultades para avanzar.